Ushaq bıletteriniń baǵasy nege qymbat: Almaty áýejaıynyń prezıdenti málimdeme jasady

ALMATY. KAZINFORM — Almaty halyqaralyq áýejaıynyń prezıdenti Goker Kose ushaq bıletteriniń qymbattyǵyna áýejaı jaýapty emes ekenin aıtty.

Áleýmettik jelilerde áýejaı qyzmetteri ushaq bıletteriniń qunyna aıtarlyqtaı áser etetini týraly aqparat tarady.

Goker Kose áýejaılardyń joǵary bılet baǵasynyń qalyptasýyna qatyspaıtynyn jetkizdi.

Aıtýynsha, álem boıynsha áýejaı alymdary áýekompanııalardyń jalpy shyǵyndarynyń tek 4 paıyzy ǵana. Qazaqstannyń ishki avıakompanııalary Azııadaǵy eń tómen áýejaılyq alymdardyń birin paıdalanady, bul eldiń avıatsııalyq sektory úshin aıtarlyqtaı básekelestik artyqshylyq. Budan basqa, olar úshin jergilikti avıatsııalyq otyn tómen baǵada tikeleı qol jetimdi.

— Almaty áýejaıy ushaq bıletteriniń joǵary baǵasyna jaýapty degen tujyrymdy joqqa shyǵarady. Shyn máninde, áýejaılar ushyraıtyn ekonomıkalyq qıyndyqtardy eskerer bolsaq, jyldar boıy ınfraqurylymǵa ınvestıtsııalar az salyndy. Bul óz kezeginde obektiler men qyzmetterdi damytý men jańǵyrtýdy qıyndatady. Degenmen, biz jolaýshylar úshin qaýipsizdik pen jaılylyqtyń joǵary deńgeıin qamtamasyz etýdi jalǵastyramyz, — dedi ol.

Sonymen qatar, ol avıatsııalyq otyn kompanııalar shyǵyndarynyń edáýir bóligin quraıtynyn jáne bul qubylys búkil álem boıynsha barlyq áýetasymaldaýshyǵa tán ekenin atap ótti.

— Alaıda, áýekompanııalar shyǵyndardy basqarýdyń túrli tetikterin paıdalana otyryp, bıletterdiń baǵasyn ońtaılandyra alady. Bul rette áýejaılardyń qarjylyq jaǵdaıynyń nasharlaýy avıakompanııalar úshin de, sońǵy jolaýshylar úshin de jaǵdaıdy jaqsartýǵa yqpal etpeıdi, — dep túsindirdi Goker Kose.

Sonymen qatar, ol barlyq múddeli tarapty, sonyń ishinde memlekettik mekemelerdi saladaǵy jaǵdaıdy jaqsartý úshin sheshimder izdeýge shaqyrdy.

Osyǵan deıin Energetıka mınıstri ushaq bıletiniń baǵasyn áýejaılar qymbattatyp otyrǵanyn aıtqan edi.