Ushaq apatynan zardap shekkenderge medıtsınalyq kómek kórsetý úshin resýrstar jetkilikti -DSM

NUR-SULTAN. QazAqparat - Almaty jáne Almaty oblysyndaǵy medıtsınalyq uıymdar ushaq apatynan zardap shekkenderdi qabyldaýǵa jáne azamattarǵa qajetti medıtsınalyq kómek kórsetýge daıyn, dep habarlady QR Densaýlyq saqtaý mınıstrliginiń baspasóz qyzmeti.

Qazaqstan Respýblıkasy Densaýlyq saqtaý mınıstrligi Almaty oblysyndaǵy ushaq apaty kezinde qaza bolǵandardyń týǵan-týystary men jaqyndaryna qaıǵyryp, kóńil aıtady.

Almaty men Almaty oblysynyń Jedel medıtsınalyq járdem brıgadalary oqıǵa ornyna 15 mınýt ishinde jetti.

Apat kezinde zardap shekkenderge jedel medıtsınalyq kómek kórsetý úshin 51 jedel medıtsınalyq kómek brıgadasy jumyldyryldy.

Almaty oblysy men Almaty qalasyndaǵy statsıonarlarlar zardap shekkenderge kómek kórsetedi.

Aldyn ala málimet boıynsha, 8 adam oqıǵa ornynda qaza tapty, 2 adam tasymaldaý kezinde kóz jumdy, 2 adam aýyr jaraqat saldarynan aýrýhanada qaıtys boldy.

Almaty qalasyndaǵy aýrýhanalarǵa zardap shekken 53 adam jatqyzyldy, onyń 9-y bala.

Saǵat 12.50-degi málimet boıynsha, dárigerler 10 adamnyń jaǵdaıy óte aýyr dep baǵalap otyr. Patsıentterge medıtsınalyq kómek kórsetý úshin qajetti resýrstar jetkilikti jáne respýblıkalyq ortalyqtardan mamandar shaqyryldy.

Aıta ketý kerek, zardap shekken azamattarǵa kómek retinde shuǵyl qan tapsyrýdyń qajeti joq.

Qazir Nur-Sultan qalasynan sanıtarlyq avıatsııa bortymen Ulttyq neırohırýrgııa ortalyǵy men travmatologııa ǴZI mamandary jolǵa shyqty.

Almaty jáne Almaty oblysynyń medıtsınalyq uıymdary zardap shekkenderdi qabyldaýǵa, barlyq qajetti medıtsınalyq kómek kórsetýge daıyn. Medıtsınalyq uıymdar tolyq dári-dármektermen jáne qan komponentterimen qamtamasyz etilgen.

Zardap shekkender men qaza tapqandardyń otbasylarymen 40 psıholog jumys isteýde.