Ushaq apatynan opat bolǵan fýtbolshy Emılıano Salanyń denesi tabyldy
ASTANA. QazAqparat - La-Mansh buǵazynda apatqa ushyraǵan ushaq synyqtarynyń arasynan fýtbolshy Emılıano Salanyń denesi tabyldy. Ony Brıtanııa koroneri rastady, dep habarlaıdy «QazAqparat» HAA VVS-ge silteme jasap.
Beısenbi kúni sý túbinen shyǵarylǵan máıittiń Emılıano Sala ekenin Dorset graftyǵynyń polıtsııasy málim etti.
Fýtbolshy men ushaqty basqarǵan ushqysh Devıd Ibbotsonnyń otbasyna járdem kórsetilip jatyr.
Aıta keteıik, 63 metr tereńde jatqan fýtbolshynyń denesi 4 aqpan kúni tabylǵan. Biraq sýdan shyǵaryp alýǵa tek 7 aqpanda ǵana múmkin boldy.
Buǵan deıin La-Mansh buǵazynan qańtarda iz-túzsiz ketken «Kardıff Sıtı» klýbynyń tarıhyndaǵy eń qymbat oıynshy, argentınalyq Emılıano Sala ushqan ushaq tabylǵanyn habarlaǵan edik.
Jeńil motorly «Paıper Malıbý» ushaǵy La-Mansh buǵazynyń ústinen ushyp ótip bara jatqanda, 22 qańtar kúni radar betinen joǵalǵan edi. Onyń bortynda bolǵan fýtbolshy Emılıano Sala buǵan deıingi búkil karerasyn frantsýz klýbtarynda ótkizgen. «Nant» oıynshysy Ýelstiń «Kardıff» klýbymen kelisimshartqa otyryp, jańa komandasyna qosylý úshin bara jatqanda apatqa ushyrady. Ol Ýels klýbynyń tarıhyndaǵy eń qymbat oıynshy edi. Onyń transferlik quny 15 mln fýnt sterlıng boldy.
