Ushaq apatynan mert bolǵan Talǵat Patsaev Shymkentte jerlendi
ShYMKENT. QazAqparat - Almaty mańyndaǵy ushaq apatynda qaza tapqan dárigerlerdiń biri Talǵat Patsaev búgin týǵan jeri Shymkentte jerlendi. Bilikti dáriger, professordy týǵan-týystary men jora-joldastary, áriptesteri aqtyq saparǵa shyǵaryp saldy, dep habarlaıdy QazAqparat tilshisi.
Aıta keteıik, 46 jasynda dúnıeden ozǵan Talǵat Patsaev «Akýsherlik jáne gınekologııa» boıynsha medıtsına ǵylymdarynyń doktory bolatyn. Úsh tildi erkin meńgergen óz isiniń bilikti mamany edi. Toqsanynshy jyldardaǵy toqyraý jyldary Ońtústik Qazaqstan oblystyq perzenthanada kóp jyldar boıy akýsher-gınekolog bolyp qyzmet atqarǵan.
Al, 2009 jyldan qazirgi tańǵa deıin QR Densaýlyq saqtaý mınıstrliginiń Akýsherlik is, gınekologııa jáne perınatologııa ǵylymı ortalyǵynyń operblok meńgerýshisi bolyp eńbek etti. Joǵarǵy sanattaǵy maman bolǵan. Jubaıy Nurjamal Jardemalıevamen eki ul tárbıelep, ósirgen. Búgin eline adal qyzmet atqarǵan azamatty sońǵy saparǵa shyǵaryp salý rásiminde ony áriptesteri, joldastary bár sát eske alyp, sóz sóıledi.
«Biz Talǵat Patsaevpen 20 jyldaı birge jumys istedik. Ol kandıdattyǵyn qorǵady, keıinnen doktorlyǵyn da qorǵap shyqty. Shapshań qımyldaıtyn ári talantty dáriger bolatyn. Sonymen qatar ujymdastarynyń aldynda da tamasha adam edi. Kez-kelgen ýaqyqqa qol ushyn berýge daıyn turatyn. Almatyda júrse de Shymkenttegi áriptesterine joq dep aıtpaıtyn, qaı ýaqytta bolmasyn aqyl keńesterin berip, aıyna eki ret kelip júretin. Balalary áli jas. Kim biledi, bolashaqta olar da áke jolyn qýyp, onyń isin jalǵastyrar dáriger bolatyn shyǵar», - deıdi áriptes dosy, medıtsına ǵylymdarynyń doktory, professor Talǵat Qudaıbergenov.
Talǵat Patsaev sondaı-aq Qazaqstan medıtsınasynda alǵash ret baýyrdan donor bolǵan áıeldiń júktilik kezin baqylap, ony bosandyryp alǵan dáriger sanalady. Jaqsy kútim men dárigerlik baqylaýdyń arqasynda Almatylyq Madına Nursulanqyzy ómirge saý balany ákeldi. Marqum bolǵan mamannyń ákesi Ánapııa Patsaev ta tanymal professor, medıtsına ǵylymdarynyń doktory. Anasy da hımııa salasynyń ǵalymy, týǵan ápkesi de ákesimen birge dárigerlik qyzmet atqarady.
«Talǵat Patsaevty týa bitken dáriger dese de bolady. Jumysyn óte jaqsy kóretin. Ózgelerdi de úıretip, ózi de úırenýden jalyqqan emes. Qaı kezde bolmasyn ol azamattan kómek te, qoldaý da kútýge bolatyn. Dáriger arasynda da óte bedeldi, syıly jan edi. Árıne, apat aıtyp kelmeıdi, biraq sondaı azamatty joǵaltyp alý bárimizge de aýyr tıdi, qabyrǵamyzdy qaıystyryp ketti dese de bolady. Ne deımiz, endi ımany ózine joldas bolsyn, qazanyń arty qaıyrly bolsyn»,- deıdi marqumnyń joldasy ári áriptesi Erlan Tájibaev.
Marqumnyń janazasyn shyǵarýǵa halyq kóp jınaldy. Quran baǵyshtalyp bolǵan soń, onyń denesi búgin Shymkenttegi zırattardyń birine jer qoınyna tapsyryldy.
Eske salaıyq, 3 qazanda Almatydan Shymkentke dárigerler brıgadasy aýyr jaǵdaıda jatqan júkti áıelge kómektesý úshin sanıtarlyq avıareısimen jolǵa shyqqan bolatyn. «AN-28» ushaǵy artynsha rodardan joǵalyp ketip, ushaq Almaty oblysy Іle aýdanynyń Mejdýrechınsk aýyly mańynda apatqa ushyraǵan edi. Apat saldarynan bort ekıpajynyń úsh múshesi men eki dáriger qaza tapty.
