Ushaq apatyna qatysty kúni buryn tujyrym jasaý durys emes – Berik Kamalıev

NUR-SULTAN. QazAqparat – Almaty túbinde apatqa ushyraǵan «Bek Eır» áýe kompanııasynyń ushaǵyna qatysty kúni buryn tujyrym jasaý durys emes. Mundaı pikirdi Ortalyq kommýnıkatsııalar qyzmetindegi baspasóz máslıhatynda QR Indýstrııa jáne ınfraqurylymdyq damý vıtse-mınıstri Berik Kamalıev bildirdi, dep habarlaıdy QazAqparat tilshisi.

«Qalaı desek te, ushaq nelikten qulady? Táýlikke jýyq ýaqyttyń ishinde biz jumysta otyryp kúni-túni rejimde sarapshylardyń túrli pikirlerin estımiz. Sizderdi Prezıdenttiń, Premer-Mınıstrdiń tapsyrmasy bar ekendigine sendirgim keledi. Komıssııa jumys istep jatyr, Memlekettik komıssııanyń barlyq músheleri keshe birden Almatyǵa ushyp ketti. Barlyǵy jumyldyryldy, jedel tergeý toby bar. Sondyqtan menińshe, kúni buryn qandaı da bir tujyrym jasaý durys emes. Kútý qajet», - dedi vıtse-mınıstr BAQ ókilderiniń saýalyna oraı.

Osy oraıda ol búgin keshki saǵat 18:40-ta Almatyǵa Máskeýden halyqaralyq sarapshy ushyp keletindigin aıtty.

«Erteń ınspektorymyzben birge qara jáshikti Máskeýge jiberemiz. Aldyn ala túsiniktemeler men sarapshylardyń pikirleri kedergi keltirip qana qoımaı, halyqqa aqparatty belgili bir deńgeıde teris jetkizetindigin de atap ótkim keledi», - dedi Berik Kamalıev.