Ushaq apaty: Zardap shekkenderdiń jaǵdaıy turaqty aýyr
ALMATY. QazAqparat – Áýe apatynda jaraqat alǵan UQK qyzmetkerleriniń jaǵdaıy áli aýyr. Bul týraly №4 qalalyq klınıkalyq aýrýhananyń bas dárigeri Saǵı Beısenbekov aıtty, dep habarlaıdy QazAqparat tilshisi.
«Eki naýqas №4 qalalyq klınıkalyq aýrýhananyń jansaqtaý bóliminde em alyp jatyr. Zardap shekkenderdiń biriniń jaǵdaıy ortasha aýyr, ekinshi naýqas - áskerı qyzmetkerdiń jaǵdaıy turaqty aýyr dep baǵalanady. Kombýstıologtar kúıik aýrýlaryn emdep jatyr. Dárigerler patsıentterdiń birin aýtodermoplastıkaǵa (óz terisiniń saý bóligin tereń jaraqat ornyna transplantatsııalaýǵa) daıyndap jatyr, birinshi kezeń sátti ótti», - deıdi №4 qalalyq klınıkalyq aýrýhananyń bas dárigeri Saǵı Beısenbekov.
Eske sala keteıik, 13 naýryz kúni Nur-Sultan-Almaty baǵytynda kele jatqan AN-26 áskerı ushaǵy 17.22 kezinde radardan joǵalyp, qala áýejaıy mańynda apatqa ushyraǵan edi.
Ushaqta bolǵan 4 adam qaza tapty. 2 adam túrli jaraqatpen Almaty qalasynyń №4 qalalyq klınıkalyq aýrýhanasyna jetkizildi.
Keıinnen Almaty dárigerleri ushaq apatynan japa shekken eki adamnyń densaýlyǵy qalaı ekenin aıtty.
Ushaq apaty bolǵan jerge qala ákimi Baqytjan Saǵyntaev baryp, zardap shekkenderge barynsha kómek kórsetýdi tapsyrdy.
Sonymen qatar, Memleket basshysy áýe apatynyń sebepterin anyqtaýdy tapsyrǵan bolatyn .
Qazaqstan Respýblıkasy Ulttyq qaýipsizdik komıteti Almatyda apatqa ushyraǵan ushaqtyń qara jáshigindegi derekter tekserilip jatqandyǵyn málim etti.
