Ushaq apaty: Vıtse-mınıstr polıtseı qutqarǵan sábıdiń jaǵdaıyn bilip qaıtty

ALMATY. QazAqparat – Densaýlyq saqtaý vıtse-mınıstri Qamaljan Nádirov ushaq apaty kezinde polıtseı qutqaryp qalǵan 9 aılyq sábıdiń qal-jaǵdaıyn bilip qaıtty, dep habarlaıdy QazAqparat.

«Biz jańa ǵana balalar aýrýhanasyndaǵy búldirshinderge kirip shyqtyq. Onyń ishinde 9 aılyq ul bala da bar. Onyń jaǵdaıy birqalypty, janynda týys-týǵandary men jaqyndary bar», - dedi vıtse-mınıstr.

Almaty qalalyq qoǵamdyq densaýlyq saqtaý basqarmasynyń basshysy Tileýhan Ábildaevtiń sózine sensek, bala ushaqta ata-anasymen birge bolǵan. Ol vıdeolardy túgel qarap shyqpaǵanyn, degenmen barlyq bala klınıkalyq balalar aýrýhanasynda em alyp jatqanyn aıtty. Jaǵdaılary birqalypty. Ómirine qaýip tónip turǵan joq.

Aıta keteıik, kishkentaı náresteni qutqarý týraly vıdeo ushaq apatynen keıin áleýmettik jelilerde tarap ketti. Keıinnen onyń 9 aılyq Ádiljan Ǵatıat ekeni belgili boldy.

Bul bala mı jaraqatymen aýrýhanaǵa túsken. Іshi, ishki organdary soqqy alǵan. Jaǵdaıy birqalypty. Al onyń ákesi 27 jastaǵy Ǵatıat Maqsut Bolatqanuly bas jaraqatymen shuǵyl medıtsınalyq qyzmet kórsetý aýrýhanasyna jatqyzyldy.

Anasy 27 jastaǵy Ǵatıat Aısulý Erqanatqyzy kishi jambastaǵy urshyq býynynyń soqqysy, bel omyrtqasynyń jaraqaty dıagnozymen tústi.

Keıinnen polıtsııa qyzmetkeri Jaqsylyq Sultanov Almaty mańyndaǵy ushaq apatynda kishkentaı náresteni qalaı qutqarǵanyn aıtyp berdi.