Ushaq apaty: Taldyqorǵandyq Baýyrjan Qalıevty jaqyndary aqtyq saparǵa shyǵaryp saldy
TALDYQORǴAN.QazAqparat – Búgin Almaty mańyndaǵy ushaq apatynda qaza bolǵandardyń biri — taldyqorǵandyq Baýyrjan Qalıevty jaqyndary jer qoınyna tapsyrdy. Marqumnyń týǵan-týystaryna Almaty oblysynyń ákimi Amandyq Batalov kelip, kóńil aıtty, dep habarlaıdy QazAqparat tilshisi.
Baýyrjan Qalıev týra bir aıdan keıin 41 jasqa tolar edi. Marqumnyń artynda 3 balasy men jary, ata-anasy qaldy.
«Jalǵyz ulym, óldi degenge qımaımyn. Júregim qars aıyrylyp barady. Ushaq apatynan qaza bolǵan jandardyń jaqyndaryna qaıǵyra kóńil aıtamyn, mundaı apattar endi elimizde bolmasa eken dep tileımin», - dedi Baýyrjan Qalıevtiń anasy Jańyl Sembaeva.
Baýyrjan qaıǵyly jaǵdaı bolatyn kúni Nur-Sultan qalasyna jumys saparymen bara jatqan. Ata-anasyna kóńil aıtyp kelip jatqandardyń qarasy qalyń. Qatarlas, synyptas dostary Baýyrjannyń aq jarqyn kóńilin, jaýapkershiligin, azamattyǵyn aıtyp, eske alýda.
«Jumysta eńbegine adal atqaratyn. Otbasyn qatty jaqsy kóretin azamat edi. Árqashan da bizge otbasy týraly aıtyp beretin. Áke-sheshesin, bala-shaǵasyn óte qatty jaqsy kórip, syılaıtyn. Ózimizge qaza aýyr tıip jatyr», dedi áriptesi Danııar Mahambet.
Baýyrjan Qalıev Taldyqorǵanda týyp ósip, mektep bitirgen. Semeıdiń zań kolledjin támamdaǵan soń eńbek jolyn quqyq qorǵaý salasynda bastaǵan. Bala-shaǵa qamymen Almatyǵa qyzmetin aýystyryp, jeke kompanııalardyń birinde jumys istep jatqan. «Endi ǵana 15 jylǵa ıpotekaǵa úı alyp, baspanaly boldym dep qýanyp júrgen azamattyń armandary kóp edi»,- dep jaqyndary qımastyqpen marqumdy jer qoınyna tapsyrdy.
