Ushaq apaty: Qutqarý jumysyna 1000-ǵa jýyq adam jumyldyryldy

ALMATY. QazAqparat - Tótenshe jaǵdaılar komıteti Almaty mańyndaǵy ushaq apaty kezinde qutqarý jumysy qalaı júrgenin aıtyp berdi, dep habarlaıdy QazAqparat.

Ushaq apaty týraly aqparat alǵan soń ІІM Tótenshe jaǵdaılar komıtetiniń Ahýal ortalyǵy bazasynda apat saldaryn joıý jáne ózara is-qımyl jasaıtyn shuǵyl jáne múddeli azamattyq qorǵaý qyzmetteriniń (ІІM, IIDM, DSM, Qorǵanysmıni, EM, AShM, TsDIAÓM, Qazgıdromet jáne UU) is-qımylyn úılestirý jónindegi respýblıkalyq jedel shtab quryldy. Respýblıkalyq jedel shtab bastyǵy – TJK tóraǵasynyń orynbasary, polkovnık T. Q. Nurmaǵambetov

Sonymen qatar, aýmaqtyq deńgeıde Nur-Sultan, Almaty qalalary, Almaty jáne Qostanaı oblystarynyń TJ departamentterinde, Nur-Sultan jáne Almaty qalalarynyń halyqaralyq áýejaılarynda 2 shtab quryldy.

«TJK ahýal ortalyǵynda, Nur-Sultan, Almaty, Almaty qalalarynda, Almaty jáne Qostanaı oblystarynda zardap shekkenderge shuǵyl psıhologııalyq kómek kórsetý úshin «qaýyrt jeli» uıymdastyryldy. Qaýyrt jeli nómirine 917 qońyraý tústi, zardap shekkenderdiń 30 týysyna shuǵyl psıhologııalyq kómek kórsetildi. Jedel jeli telefondaryna Nıderlandy, AQSh, Fılıppın, Fınlıandııa, Reseı, Slovakııa jáne Germanııa elshiliginen qońyraý kelip tústi. Nur-Sultan qalasynyń áýejaıynda zardap shekkenderdiń týystaryna shuǵyl psıhologııalyq kómek kórsetý boıynsha jumystar uıymdastyryldy, bul jumysqa 23 psıholog, onyń ishinde TJK Apattar medıtsınasy ortalyǵynyń 2 psıhology jáne 1 brıgadasy, sondaı-aq Nur-Sultan qalasy Qoǵamdyq densaýlyq saqtaý basqarmasynyń medıtsınalyq uıymdarynan 18 psıholog jáne áýejaıdyń 3 psıhology jumyldyryldy» delingen habarlamada.

Ushaq apaty kezinde zardap shekkender úshin Nur-Sultan jáne Almaty qalalary TJD jeke quramy qan tapsyrdy.

Qutqarý operatsııasyna barlyǵy 984 adam, 72 tehnıka jáne 33 jedel medıtsınalyq kómek brıgadasy jumyldyryldy: Almaty qalasy jáne Almaty oblysy TJD (60 qyzmetker men 16 tehnıka), TJK Respýblıkalyq jedel-qutqarý jasaǵy (24 qyzmetker, 4 kınologııalyq esep jáne 4 tehnıka), Almaty qalasy ІІD (470 polıtsııa qyzmetkeri men 40 tehnıka), UU (420 adam men 10 tehnıka), Almaty qalasy ákimdiginiń qutqarý qyzmeti (10 qyzmetker men 2 tehnıka).