Ushaq apaty: Qaza bolǵandardyń týystary tegin ushady
NUR-SULTAN. QazAqparat – 28 jeltoqsan kúni Air Astana áýe kompanııasy Almaty men Nur-Sultan arasynda qosymsha reıster engizedi. Bul týraly «Nursultan Nazarbaev» halyqaralyq áýejaıynyń baspasóz qyzmeti málimdedi, dep habarlaıdy QazAqparat.
«2019 jyldyń 28 jeltoqsanynda «Air Astana» áýe kompanııasy «Almaty - Nur-Sultan - Almaty» jáne «Nur-Sultan – Almaty – Nur-Sultan» baǵyttary boıynsha qosymsha reıster engizedi. Nur-Sultannan ushý ýaqyty – tańǵy 05:00, Almatydan ushý ýaqyty – tańǵy 07:00», - delingen habarlamada.
Bek Air áýe kompanııasy ushaǵynyń apatynda mert bolǵandardyń týystary tegin tasymaldanady.
Aıta keteıik, búgin tańerteń Almatydan Nur-Sultan qalasyna ushyp shyqqan ushaq radardan joǵalyp ketti.
Keıin 95 jolaýshy men 5 ekıpaj múshesi bar ushaqtyń apatqa ushyraǵany málim boldy. Oqıǵanyń mán-jaıyn anyqtaý úshin ushaq qulaǵan aýmaqqa arnaıy komıssııa ushyp shyqty.
QR Prezıdenti Qasym-Jomart Toqaev ushaq apatyna kináliler zańǵa sáıkes qatań jazalanatynyn málimdedi. Elbasy Nursultan Nazarbaev jolaýshylar ushaǵynyń apatqa ushyraýyna baılanysty kóńil aıtty.
QR DSM ushaq apatynan zardap shekkenderge medıtsınalyq kómek kórsetý úshin resýrstar jetkilikti ekenin, qan tapsyrýdyń qajeti joq ekenin málimdedi.
