Ushaq apaty: Eljan Birtanov ekinshi ushqyshtyń densaýlyǵy týraly aıtty

NUR-SULTAN. QazAqparat – Almaty túbinde «Bek Air» ushaǵynyń apatqa ushyraýy saldarynan zardap shekken 3 adam aýrýhanadan shyqty, dep habarlaıdy QazAqparat tilshisi.

«Ótken táýlikte 3 adam aýrýhanadan shyqtyq. Klınıkalarda 46 patsıent, onyń ishinde 9 bala qalyp otyr. Balalardyń jaǵdaıy turaqty, olar reanımatsııa bólimshesinen aýystyryldy. Ómirlerine esh qaýip tónip turǵan joq. Degenmen, tıisinshe sapaly em qajet. Jaǵdaıdy mınıstrlik baqylaýda ustap otyr», - dedi Úkimet otyrysynan keıin BAQ ókilderine suhbat bergen QR Densaýlyq saqtaý mınıstri Eljan Birtanov.

Onyń dereginshe, birneshe adamnyń jaǵdaıy óte aýyr bolǵandyqtan reanımatsııa bólimshesinde jatyr.

«№4 qalalyq aýrýhanada 7 adam, Almaty oblystyq klınıkalyq aýrýhanada 2 adam reanımatsııa bólimshelerinde jatyr. Bir patsıenttiń ómirine qaýip tónip tur. Qazirgi ýaqytta ol jerde ǵylymı ortalyqtardyń basshylary jetekshilik jasaıtyn top jumys istep jatyr. Keshe keńes ótkizip, emdeý ádisin anyqtady. Jalpy, emdeý tolyq kólemde júrgizilip jatyr», - dedi Eljan Birtanov.

Sonymen qatar, ol ushaqtyń ekinshi ushqyshynyń jaı-kúıi jaıynda da derektermen bólisti.

«Jaǵdaıy óte aýyr bolǵanymen turaqty. Reanımatsııada jatyr», - dedi ol.

Eske salsaq, 27 jeltoqsanda Almatydan Nur-Sultan qalasyna ushyp shyqqan ushaq radardan joǵalyp ketti.

Keıin 95 jolaýshysy jáne 5 ekıpaj múshesi bar ushaqtyń apatqa ushyraǵany málim boldy.

Oqıǵanyń mán-jaıyn anyqtaý úshin ushaq qulaǵan aýmaqqa arnaıy komıssııa ushyp shyqty.

QR Prezıdenti Qasym-Jomart Toqaev ushaq apatyna kináliler zańǵa sáıkes qatań jazalanatynyn málimdedi.

Elbasy Nur-Sultan Nazarbaev jolaýshylar ushaǵynyń apatqa ushyraýyna baılanysty kóńil aıtty.