Ushaq apaty: Dárigerler zardap shekkenderdiń jaǵdaıy týraly aıtty
ALMATY. QazAqparat – Áýe apatynda jaraqat alǵan UQK qyzmetkerleriniń jaǵdaıy áli aýyr. Bul týraly №4 qalalyq klınıkalyq aýrýhananyń bas dárigeri Saǵı Beısenbekov pen qalalyq qoǵamdyq densaýlyq saqtaý basqarmasynyń ókili Laýra Myrzaǵalı onlaın brıfıng barysynda málim etti, dep habarlaıdy QazAqparat tilshisi.
«Jaǵdaılary turaqty aýyr. Qarqyndy terapııa jaǵdaıynda baqylaýda. Densaýlyqtaryn jaqsartý úshin barlyq qajetti sharalar qabyldanýda «, - dedi №4 qalalyq klınıkalyq aýrýhananyń bas dárigeri Saǵı Beısenbekov.
Zardap shekkenderdiń densaýlyǵy týraly Almaty qalalyq qoǵamdyq densaýlyq saqtaý basqarmasynyń ókili, telemedıtsına ortalyǵynyń basshysy Laýra Myrzaǵalı da túsinikteme berdi.
«Olardyń ómirin saqtap qalý úshin dárigerler baryn salýda. Qazir olardyń jaǵdaıy turaqty aýyr. Ekeýi de №4 qalalyq klınıkalyq aýrýhanada jatyr. Alǵashqy kúnnen bastap bizdiń dárigerler olarǵa qajetti medıtsınalyq kómek kórsetýde «, - dedi spıker brıfıng barysynda.
Eske sala keteıik, 13 naýryz kúni Nur-Sultan-Almaty baǵytynda kele jatqan AN-26 áskerı ushaǵy 17.22 kezinde radardan joǵalyp, qala áýejaıy mańynda apatqa ushyraǵan edi.
Ushaqta bolǵan 4 adam qaza tapty. 2 adam túrli jaraqatpen Almaty qalasynyń №4 qalalyq klınıkalyq aýrýhanasyna jetkizildi.
Keıinnen Almaty dárigerleri ushaq apatynan japa shekken eki adamnyń densaýlyǵy qalaı ekenin aıtty.
Ushaq apaty bolǵan jerge qala ákimi Baqytjan Saǵyntaev baryp, zardap shekkenderge barynsha kómek kórsetýdi tapsyrdy.
Sonymen qatar, Memleket basshysy áýe apatynyń sebepterin anyqtaýdy tapsyrǵan bolatyn.
Qazaqstan Respýblıkasy Ulttyq qaýipsizdik komıteti Almatyda apatqa ushyraǵan ushaqtyń qara jáshigindegi derekter tekserilip jatqandyǵyn málim etti.
