Ushaq apaty: Dáriger aýrýhanada jatqandardyń jaǵdaıy týraly aıtty
ALMATY. QazAqparat – Almatydaǵy №4 qalalyq klınıkalyq aýrýhanasynyń jansaqtaý bóliminiń meńgerýshisi Jandos Dáýletbekov áýe apatynda jaraqat alǵan UQK qyzmetkerleriniń jaǵdaıy týraly aıtty, dep habarlaıdy QazAqparat tilshisi.
Dárigerdiń aıtýynsha, ázirge eshqandaı ózgeris joq.
«13 naýryzda bolǵan áýe apatynan zardap shekken eki adam №4 qalalyq klınıkalyq aýrýhanaǵa saǵat 18: 05-te óte aýyr jaǵdaıda tústi. Ekeýiniń jaǵdaıyna qatysty aýrýhanalar men vedomstvolyq medıtsınalyq qyzmet mamandarynan turatyn qalalyq konsılıým ótti. Zardap shekkenderdi emdep jatyrmyz, biraq jaǵdaılary óte aýyr», - dedi Jandos Dáýletbekov.
Eske sala keteıik, búgin Nur-Sultan-Almaty baǵytynda kele jatqan AN-26 áskerı ushaǵy 17.22 kezinde radardan joǵalyp, qala áýejaıy mańynda apatqa ushyraǵan edi.
Ushaqta bolǵan 4 adam qaza tapty. 2 adam túrli jaraqatpen Almaty qalasynyń №4 qalalyq klınıkalyq aýrýhanasyna jetkizildi.
Keıinnen Almaty dárigerleri ushaq apatynan japa shekken eki adamnyń densaýlyǵy qalaı ekenin aıtty.
Ushaq apaty bolǵan jerge qala ákimi Baqytjan Saǵyntaev baryp, zardap shekkenderge barynsha kómek kórsetýdi tapsyrdy.
Sonymen qatar, Memleket basshysy áýe apatynyń sebepterin anyqtaýdy tapsyrǵan bolatyn.
Qazaqstan Respýblıkasy Ulttyq qaýipsizdik komıteti Almatyda apatqa ushyraǵan ushaqtyń qara jáshigindegi derekter tekserilip jatqandyǵyn málim etti.
