Ushaq apaty: Almatynyń bas dárigeri aýrýhanada jatqandardyń jaǵdaıy týraly aıtty
ALMATY. QazAqparat – Almaty qalalyq qoǵamdyq densaýlyq saqtaý basqarmasynyń bastyǵy Narıman Tabynbaev áýe apatynda jaraqat alǵan UQK qyzmetkerleriniń jaǵdaıy týraly aıtty, dep habarlaıdy QazAqparat tilshisi.
Narıman Tabynbaev 13 naýryzda bolǵan áýe apatynan zardap shekken eki adam №4 qalalyq klınıkalyq aýrýhanaǵa saǵat 18: 05-te óte aýyr jaǵdaıda túskenin aıtty.
«1990 jyly týǵan naýqastyń dıagnozy: aralas jaraqat, bassúıek-mıdyń jabyq jaraqaty, keýde qýysynyń kóptegen synýy, aıaqtyń synýy, ish jaraqaty, ókpeniń jaraqattanýy jáne 15% kúıik shalý. Aýrýhanaǵa túsken alǵashqy mınýttan bastap ol shokqa qarsy sharalar qabyldady. Barlyq kúsh jaǵdaıyn turaqtandyrýǵa baǵyttaldy.Synǵan aıaǵyna jedel hırýrgııalyq operatsııa jasaldy. Ekinshi naýqas 1996 jyly týǵan. Oǵanda túrli dene jaraqaty dıagnozy qoıyldy. Bassúıek-mıdyń jabyq jaraqaty, onyń omyrtqasy synǵan. Ekeýi de bilikti mamandardyń baqylaýynda», - dedi Narıman Tabynbaev.
Onyń aıtýynsha, olardyń ómirine tóngen qaýip seıildi.
«Desekte úlken jaraqat bar ekenin túsinýimiz kerek. Sondaı-aq, asqyndyratyn faktor bar – ol kúıik jaraqattary. Olardyń ózindik kezeńderi bar.Sondyqtan, biz múmkin asqynýlardan qorqamyz. Bizdiń barlyq mamandardy jumyldyrdyq. Atap aıtsam, reanımatologtar, travmatologtar, hırýrgter. Biz olardyń ómirin saqtap qalý úshin kúresemiz. Qazir syrttan maman shaqyrýdyń qajeti joq. Bizdiń naýqastardyń jaǵdaıy turaqtalady dep senemiz «, - dedi spıker.
Eske sala keteıik, 13 naýryz kúni Nur-Sultan-Almaty baǵytyndaǵy AN-26 áskerı ushaǵy radardan joǵalyp, Almaty áýejaıy mańynda apatqa ushyraǵan edi.
Ushaqta bolǵan 4 adam qaza tapty, 2 adam túrli jaraqatpen Almaty qalasynyń №4 qalalyq klınıkalyq aýrýhanasyna jetkizildi.
Keıinnen Almaty dárigerleri ushaq apatynan japa shekken eki adamnyń densaýlyǵy qalaı ekenin aıtty.
Ushaq apaty bolǵan jerge qala ákimi Baqytjan Saǵyntaev baryp, zardap shekkenderge barynsha kómek kórsetýdi tapsyrdy.
Sonymen qatar, Memleket basshysy áýe apatynyń sebepterin anyqtaýdy tapsyrǵan bolatyn.
Qazaqstan Respýblıkasy Ulttyq qaýipsizdik komıteti Almatyda apatqa ushyraǵan ushaqtyń qara jáshigindegi derekter tekserilip jatqandyǵyn málim etti.
