Ushaq apatynan zardap shekken naýqastardyń bas súıekteri men ókpeleri jaraqattanǵan
AQTAÝ. KAZINFORM – Bul týraly Mańǵystaý oblystyq kópbeıindi aýrýhanasy medıtsınalyq qyzmet sapasyn qadaǵalaý bóliminiń basshysy Janar Baımanova málimdedi. Dárigerdiń aıtýynsha, naýqastardyń arasynda kúıik shalǵandar joq.
- Jaraqattary kóptik jaraqat dep atalady. Súıek synýymen qatar bas jaraqaty. Ókpe jaraqaty men jumsaq tinderdiń, bas súıeginiń jaralanýy, ishtiń de jaraqattary kezdesedi, - deıdi Janar Baımanova.
Mańǵystaý oblystyq aýrýhana keshe kúsheıtilgen rejımde jumys istedi. Ushaq apatynan zardap shekkender jappaı túskesin 70-ten asa dáriger, 100-den asa orta qyzmetker men 50-den astam kishi qyzmetker jumyldyryldy. Aýdan-qalalardaǵy bilikti mamandar da kómekke kelgen.
- Túnimen astanalyq dárigerler, Ázerbaıjan Respýblıkasy men Reseı Federatsııasynan kelgen bilikti mamandar jumys istedi. Búgin tańerteń reseılik dárigerler 8 eresek pen 1 balany arnaıy bortpen elderine alyp ketti. Qazir oblystyq aýrýhanada 19 eresek, balalar aýrýhanasynda 1 bala bar. Naýqastardyń jeteýi jalpy jansaqtaý ortalyǵynda jatyr. Bala da jansaqtaý bóliminde, - deıdi oblystyq kópbeıindi aýrýhanasy medıtsınalyq qyzmet sapasyn qadaǵalaý bóliminiń basshysy Janar Baımanova.
Ázerbaıjan Respýblıkasynan kelgen mamandar ózderiniń azamattarymen jumys istep, týystarymen baılanystyrý sııaqty qajet kómekterdi uıymdastyrýda. Jaǵdaıy qalypty azamattardy elderine alyp ketý máselesi búgin sheshilmek.
Aıta ketetin jáıt, oblystyq aýrýhanaǵa túsken 27 naýqastyń 3-eýiniń jeke basyn anyqtaý qıynǵa soqqan bolatyn. Sonyń ekeýi anyqtaldy. Endi bir naýqastyń kim ekeni belgisiz. Eresek áıeldiń bet pishini jaraqattanǵan, ári qujaty joq.
Buǵan deıin, QR TJM baspasóz qyzmeti Aqtaý mańynda apatqa ushyraǵan ushaqqa qatysty sońǵy derekterdi jarııalady.
Sondaı-aq polıtseıler ushaq apatynan zardap shekkenderge kómektesý úshin qan tapsyrdy.
