Ushaq apatynan kóz jumǵan 3 mańǵystaýlyqtyń otbasylaryna qarjylaı kómek berildi

ASTANA. KAZINFORM — Ushaq apatynan qaıtys bolǵan jáne zardap shekken azamattardyń týystaryna barlyq qoldaý sharalary kórsetilýde, dep habarlaıdy Mańǵystaý oblysynyń ákimdigi.

Aqtaý mańyndaǵy ushaq apatynan qaıtys bolǵandar men zardap shekken azamattardy alyp ketýge kelgen týystaryna Mańǵystaý oblysy tarapynan barlyq qoldaý sharalary kórsetilýde.

Dárigerler men tótenshe jaǵdaı qyzmetkerleri, ákimdik ókilderi men volonterlar kúsheıtilgen rejımde jumys isteýde.

Týystaryn alyp ketýge kelgen shetel azamattaryn áýejaıdan kútip alyp-shyǵaryp salý, qonaq úıge ornalastyrý jáne t. b. qoldaýlar jasalýda.

Atap aıtqanda, óńirlik psıhologtar men dárigerler oblystyq aýrýhanada qaıǵyryp júrgen jandardyń densaýlyǵyn tekserip, psıhologııalyq kómek berip jatyr.

Sondaı-aq, ystyq tamaq pen sháımen qamtamasyz etilýde.

— Sonymen qatar, ushaq apatynan kóz jumǵan Mańǵystaý oblysynyń 3 azamatynyń otbasyna qarjylaı kómek berilip, marqumdardy jerleý rásimderine qoldaý kórsetildi,  — delingen ákimdik habarlamasynda.

Eske sala keteıik, 25 jeltoqsanda Aqtaý mańynda Azerbaijan Airlines ushaǵy apatqa ushyrady.

Ushaq bortynda 67 adam, onyń ishinde bes ekıpaj múshesi bolǵan. Oqıǵa saldarynan 38 jolaýshy qaza tapty. Ókinishke qaraı, mert bolǵan jandardyń arasynda 6 Qazaqstan azamaty bar.