Ushaq apatynan qaza tapqandardy túrinen taný múmkin bolmady – Aqtaýlyq krımınalıst
AQTAÝ. KAZINFORM – Mańǵystaý oblystyq Polıtsııa departamenti jedel krımınalıstıka barqarmasynyń krımınalısi Aıbek Álibaev ushaq apatynan qaza tapqandardyń múrdesin tanytý tobynda jumys istegen. Ol 38 adamnyń múrdesin týystaryna tanytý ońaı bolmaǵanyn aıtady.
- Qaza tapqan 38 adamnyń týystary ár elden elip, tanytý jumystary júrgizildi. Túrlerinen anyqtaý múmkin bolmady. Sondyqtan týystarynan suraı otyryp, denelerindegi erekshe belgilermen izdeı bastadyq. Meńine, tyrtyǵyna, tatýırovkasyna jáne altyn tisine qarap tanydy. Týystaryna da óte aýyr boldy. Taný kezinde júregi shydamaǵandarǵa bizdiń medıtsına mamandarymyz kómek kórsetti. Endi apat bolmasyn, - deıdi krımınalıst Aıbek Álibaev.
Oblystyq Polıtsııa departamenti jedel krımınalıstıka barqarmasynyń krımınalısi Aıbek Álibaev Prezıdent Jarlyǵymen Baýyrjan Momyshuly atyndaǵy ekinshi dárejeli «Aıbyn» ordenimen nagradtaldy.
Búgin Aqtaýda ushaq apaty bolǵan kezde erlik kórsetken turǵyndarǵa, medıtsına mamandaryna, órt sóndirýshiler men qutqarýshylarǵa barlyǵy - 69 adamǵa Prezıdenttiń alǵysy jarııalanyp, memlekettik nagradalar tabystaldy.
Solardyń biri, Túpqaraǵan aýdany Atash kentiniń turǵyny Elmıra Ákibaeva erligi úshin Prezıdenttiń alǵysymen marapattaldy. Ol ushaq qulaǵan kezde áriptesterimen avtobýsta ketip bara jatyp, kólikti oqıǵa ornyna buryp, qulaǵan ushaqqa birinshi jetken. Jedel járdem kelgenshe jaralanǵandardy avtobýsqa otyrǵyzyp, alǵashqy kómek kórsetken.
- Qulaǵan ushaqtan jaraqattanǵan adamdar shyǵyp jatty. Stıýardessa men bort provodnıkke kómektesip, avtobýsqa otyrǵyzdyq. Sosyn jaraqattanǵan qyz bala boldy. Ústinde aq kúrteshesi bar, 8-10 jas shamasynda. Sol qyz balanyń aıtqan sózderi esimnen keter emes. «Meni qoıa berińiz, ishte anam bar, meniń anamdy qutqaryńyzshy, - dep jylaǵan daýysy áli qulaǵymda. Sol kezde men qyzdy anań tiri dep jubatýǵa tyrystym. Balaǵa psıhologııalyq kómek kórsettim, - deıdi Elmıra Ákibaeva.
Buǵan deıin, Aqtaýda Azerbaijan Airlines ushaǵy apatqa ushyraǵany týraly jazǵan bolatynbyz.