Ushaq apatynan qaıtys bolǵan azamattardyń týystaryna qarjylaı kómek kórsetildi

ASTANA. KAZINFORM — Aqtaý mańyndaǵy ushaq apatynan qaıtys bolǵandar men zardap shekken azamattardy alyp ketýge kelgen týystaryna Mańǵystaý oblysy tarapynan barlyq qoldaý sharalary kórsetilip jatyr.

Oblys ákimdigi baspasóz qyzmetiniń málimetinshe, dárigerler men tótenshe jaǵdaı qyzmetkerleri, ákimdik ókilderi men volonterlar kúsheıtilgen rejımde jumys istep jatyr.

Týystaryn alyp ketýge kelgen shetel azamattaryn áýejaıdan kútip alyp-shyǵaryp salý, qonaq úıge ornalastyrý jáne t.b. qoldaý kórsetilip jatyr. Atap aıtqanda, óńirlik psıhologtar men dárigerler oblystyq aýrýhanada qaıǵyryp júrgen jandardyń densaýlyǵyn tekserip, psıhologııalyq kómek berip jatyr. Sondaı-aq, ystyq tamaq pen sháımen qamtamasyz etildi.

Sonymen qatar, ushaq apatynan kóz jumǵan Mańǵystaý oblysynyń 3 azamatynyń otbasyna qarjylaı kómek berilip, marqumdardy jerleý rásimderine qoldaý kórsetildi.

Ázerbaıjannyń Densaýlyq saqtaý mınıstri Qazaqstan dárigerlerine alǵys aıtqan bolatyn.

Eske sala keteıik, Aqtaý mańynda Bakýden Groznyıǵa baǵyt alǵan ushaq apatqa ushyrady.

Ushaq bortynda 67 adam, onyń ishinde bes ekıpaj múshesi bolǵan. Oqıǵa saldarynan 38 jolaýshy qaza tapty.