Ushaq apaty kezinde oqıǵa ornyna eń birinshi jetken aqtaýlyq áskerı qyzmetker sol sáttegi áserimen bólisti
ASTANA. KAZINFORM — Aqtaý mańynda bolǵan ushaq apaty kezinde eń alǵashqy bolyp oqıǵa ornyna jetip, áýe kemesiniń esigin ashyp, qutqarý jumystaryna atsalysqan azamat - QR Áýe qorǵanys kúshteri avıatsııalyq bazasynyń áskerı qyzmetkeri Nurlan Botaǵarın, dep jazady otpannews.kz.
Ushaq apaty bolǵan mańaıda Áýe qorǵanys kúshteri avıatsııalyq bazasynyń stantsııasy ornalasqan. Nurlan Botaǵarın 30153 áskerı bóliminiń kelisim-shart boıynsha áskerı qyzmetshisi retinde sol kúni kezekshilik jumysynda bolǵan. Ushaqtyń qulaǵanyn kórgende jumys ornyna áriptesin qaldyryp, ózi esh oılanbastan qulaǵan ushaqqa qaraı júgirgen.
- Áýedegi ushaqtyń qona almaı júrgenin baıqaǵannan keıin, kóz almaı qarap turdym. Oqıǵa oryn alǵan kezde dereý kóligime otyryp, ushaqqa qaraı bettedim. Alǵashqyda 10 shaqty adamy bar kishkentaı ushaq shyǵar dep oıladym. Biraq adam kóp eken. Aldymnan aq kóılekti, ústi basy qan-qan bolǵan kishkentaı qyz shyqty. Rasynda mundaı aýyr jaǵdaılardy, bólingen dene múshelerin, júregiń aýyratyn qıyn sátti kórmegennen keıin, shoshyp ta kettim. Artqy jaqtaǵy ushaqtyń bólingen tusyndaǵy esikti qatty teýip ashyp qalyp edim, ar jaqtan shyǵa almaı jatqan biraz adam baryn kórdim. Solaı bárin shyǵarýǵa tyrysyp jatqanda kómekke “Mańǵystaý óńirlik elektrotoraptyq kompanııasy” (MÓEK) qyzmetkerleri men qutqarýshylardyń kelip jatqanyn baıqadym. Jedel járdemniń daýsy shyǵyp, olar da jaqyndap qalǵanyn bildim. Solaı barynsha qolymnan kelgen áreketti jasadym, - dedi qutqarýshy.
29 jastaǵy Nurlan Botaǵarın Aqtaý qalasynyń turǵyny. Boranqul aýylynyń týmasy. Búginde jary ekeýi eki qyz tárbıelep otyr.
Nurlan bul áreketin áskerı boryshy ǵana emes, azamattyq paryzym dep esepteıdi. “Jaqsynyń jaqsylyǵyn aıt nury tasysyn” demekshi, aýyr apatta eń alǵashqy kómek kórsetken qutqarýshylarǵa alǵysymyz sheksiz.