Ushaq apaty. Halyqaralyq áýe kóligi assotsıatsııasynyń basshysy málimdeme jasady

ASTANA. KAZINFORM — Halyqaralyq áýe kóligi assotsıatsııasynyń (IATA) bas dırektory Vıllı Ýolsh Aqtaý mańynda bolǵan ushaq apatyna qatysty málimdeme jasady. 

— Azamattyq ushaqtar eshqashan áskerı operatsııalardyń ádeıi nemese kezdeısoq nysany bolmaýy kerek. Reseı men Ázerbaıjandy qosa alǵanda, taǵy birneshe el úkimeti atap ótkendeı, «Ázerbaıjan áýe joldary» 8243 reısi áskerı operatsııalardyń qurbany bolýy múmkindigi muqııat, ashyq jáne beıtarap tergeý kerektigin kórsetedi. Búkil álem Chıkago konventsııasynda kelisilgen halyqaralyq mindettemelerge sáıkes 30 kún ishinde talap etiletin jarııalymdy asyǵa kútedi, — deıdi Vıllı Ýolsh málimdemesinde. 

Aıta keteıik, Qazaqstan áýe bortyndaǵy ózdiginen jazǵyshtardy Brazılııaǵa jiberdi. 

Chıkago konventsııasynyń 13 qosymshasyna sáıkes tergeý júrgizetin memleket borttyq ózdiginen jazǵysh derekterin oqýdy qamtamasyz etedi jáne olardy qaı elde taratyp jazý týraly sheshim qabyldaıdy. Bul týraly QR Kólik mınıstrligi habarlady.

Eske salaıyq, Memleket basshysy ushaq apatynan zardap shekkenderge kómek kórsetýdi erekshe baqylaýda ustaýdy tapsyrdy.