Ushaq apaty: Ázerbaıjan jurty qazaq halqyna alǵys aıtyp jatyr
ASTANA. KAZINFORM – Birer kún buryn Aqtaý mańynda Ázerbaıjan ushaǵy apatqa ushyrady. Áýe bortynda birneshe eldiń azamattary boldy, onyń ishinde qazaqstandyqtar da bar.
Ókinishke qaraı, áýe apatynan mert bolǵandar bar, bortta bolǵan barlyq Qazaqstan azamaty qaıtys boldy. Apattan aman qalǵan jandarǵa bizdiń dárigerler men basqa da quzyrly organdardyń mamandary jan-jaqty kómek kórsetip jatyr.
Osy oraıda qazaq halqyna alǵys aıtyp jatqan ázerbaıjan jáne basqa da qarapaıym azamattardyń jelidegi pikirin sholyp ótken edik.
- Alǵa, Qazaqstan! Týdy kórip tursyzdar ma? Bul bizdiń áýe bortyn qabyldaǵan uly Qazaqstannyń týy. Ushaqtaǵy apattan mert bolǵan barsha qazaqqa kóńil aıtamyn. Áýe bortyn qabyldaǵany úshin, der kezinde qolyn ushyn sozyp kómek kórsetkeni úshin uly qazaq halqyna shyn júrekten alǵys aıtamyn. Qazaqstandyqtar qan tapsyrdy, Tótenshe jaǵdaılar mınıstrligi shuǵyl áreket etti, qaıǵy shekken jandar Ázerbaıjan elshiliginiń aldyna gúl shoqtaryn qoıdy. Siz uly halyqsyz, kóp raqmet! Sizder bizdiń baýyrsyzdar, alǵa Qazaqstan, alǵa Turan!
Shynymdy aıtam, basymdy ıemin. Qıyn sátte qasymyzdan tabylyp, baýyr retinde qol ushyn sozdyńyzdar, myń alǵys, - dep Ázerbaıjan azamaty vıdeo arqyly alǵys aıtty.
Áleýmettik jelide osy sekildi pikir jazyp jatqan jandar barshylyq.
- Men Qazaqstandy súıemin! Ultym – sheshen. Osynda týyp-óstim, turyp jatyrmyn. Men Qudaıdyń qazaq jerinde jaratqanyna qýanyshtymyn. Bul jerde keremet jandar. Qazaq qıyn sátte únemi qol ushyn sozatynyn ómir kórsetip otyr. Aqtaýdaǵy qaıǵyly sátte jaqyn mańdaǵy elektrıkter, dárigerler men basqa da beı-jaı qaramaǵan jandar dereý kómegin kórsetip, adam ómirin qutqarýǵa atsalysty. Beıbitshilik bolsyn!, - dep jazdy otandasymyz jelide.
- Raqmet, Qazaqstan! Júzdegen lıtr qan tapsyryp, qıyn sátte qoldaý kórsetkenderińiz úshin shyn júrekten alǵys, - degen pikir qaldyrǵan Leıla Nasyrova esimdi jeli qoldanýshysy.
- Qazaqstan baýyryma basymdy ıemin. Baýyr qıyn sátte tanıdy. Bizdiń jaqyn jandardy qutqarǵandaryńyz, jedel áreket úshin raqmet!, - degen pikir qaldyrypty jelide.
- Qazaq halqy Aqtaý mańyndaǵy ushaq apatynan aman qalǵan jandarǵa kómek retinde qan tapsyrýǵa kezekte tur. Sizderge raqmet! – deıdi Gamıd Gamıdov esimdi azamat.
Aqtaý mańyndaǵy áýe apaty oqıǵasynyń barysymen siltemege ótip tanysýǵa bolady.