Úsh jylda JOO-lardyń janyndaǵy 60 dıssertatsııalyq keńes jabyldy

NUR-SULTAN. QazAqparat – Sońǵy 3 jyldyń ishinde elimizdiń joǵary oqý oryndary janyndaǵy 60 dısertatsııalyq keńes jabyldy. Bul jaıynda Bilim jáne ǵylym mınıstri kezindegi qyzmeti týraly esep bergen Oqý-aǵartý mınıstri Ashat Aımaǵambetov aıtty, dep habarlaıdy QazAqparat tilshisi.

«Ulttyq ǵylymı keńester jumysynyń ashyqtyǵy qamtamasyz etildi. Ashyq daýys berý, onlaın-translıatsııa men otyrystardy beınejazbaǵa túsirý arqyly sheshim qabyldaý protsesterin barlyǵyna ashyq jáne qoljetimdi ettik. UǴK quramy aıtarlyqtaı jańartylyp, olarǵa degen senim deńgeıi de arta tústi. Sarapshylarǵa qoıylatyn talaptar da kúsheıtildi, ǵalymdarǵa ótinishterdi úsh kún ishinde pysyqtaý quqyǵy berilip, saraptamanyń shekti baly 21-den 25-ke deıin kóterildi. Sondaı-aq saraptama bazasy jańartyldy. Sonymen qatar akademııalyq adaldyq pen ǵylymı etıka máselelerine kóp kóńil bólinip otyr. Nátıjesinde sybaılas jemqorlyq áleýeti aıtarlyqtaı tómendedi, ǵalymdardyń granttar berý sheshimderine qatysty shaǵymdary da azaıdy», - dep jazdy mınıstr Facebook paraqshasynda.

Onyń atap ótýinshe, sapany qamtamasyz etý komıtetiniń (KOKSON) ǵylymı jýrnaldarynyń jumysy tolyǵymen qaıta iske qosyldy.

Maqalalardy onlaın tirkeý, jabyq retsenzııalaý sııaqty talaptar engizildi. Redaktsııalyq alqa quramyna Hırsh ındeksi nemese Web of Science jáne Scopus-te jarııalanymdary bar ǵalymdar tartylady.

Lıtsenzııalyq qaryz alýdy tekserý júıeleri qoldanylady jáne basqa da kóptegen halyqaralyq talap engizildi. Endi qazaqstandyq jýrnaldar ózderiniń jarııalanymdarynyń sapasyn jaqsartyp, esep berýge mindetti bolady.

«Sonymen birge úsh jyl ishinde 60 dıssertatsııalyq keńes jabyldy. Bul kóptegen ýnıversıtet basshylaryna unamaǵan da bolar, biraq bul qajetti shara boldy. Óıtkeni biz mundaı sheshimderdi qabyldaý kezinde sapany birinshi orynǵa qoıamyz. Keńesterdiń jumysyna jańa talaptar engizildi. Budan bylaı keńes músheleriniń jartysy dıssertatsııa taqyrybyna baılanysty taǵaıyndalady, dıssertatsııa qorǵaý sáti ınternette tikeleı efırde kórsetilip, onyń mátini bárine qoljetimdi bolatyndaı jerde jarııalanady. Al ýnıversıtetterge dıssertatsııalardy memlekettik tilge aýdarýyn qamtamasyz etý mindetin júktedik», - dedi Ashat Aımaǵambetov.