Úsh jylda jazdyq jaıylymdarda 1400-ge jýyq sý qudyǵy qazyldy
Bul týraly búgin «Jaıylymdar týraly» Qazaqstan Respýblıkasy Zańynyń jobasy talqylanǵan Májilistiń jalpy otyrysynda QR aýyl sharýashylyǵy vıtse-mınıstri Gúlmıra Isaeva málim etti, dep habarlaıdy QazAqparat.
«2014-2016 jyldar aralyǵynda bizde 1142 qudyq qazý josparlanǵan bolatyn. Búginde jospar artyǵymen oryndalyp, qazirdiń ózinde 4 mlrd. teńgeden astam somaǵa 1377 qudyq qazyldy. Buǵan qosa, qudyqtardy qazýǵa memleket esebinen shyǵyndardy óteýge 80 paıyzdyq sýbsıdııa bar, al qalǵan 20 paıyzyn fermer lızıng baǵdarlamasy boıynsha paıdalana alady», - dedi vıtse-mınıstr.
Onyń aıtýynsha, fermerlerdiń jazdyq jaıylymdarda qudyq qazý úshin shyǵyndaǵan qarjysyn qaıtarýǵa 2 mlrd. teńgeden astam soma jumsalǵan.
Sonymen birge G.Isaeva jaıylymdar qurýǵa arnalǵan ınvestıtsııalyq sýbsıdııa quraldaryn keńeıtýdi kózdeıtin baǵdarlama ázirlenip jatqanyn aıtty. Atalǵan baǵdarlama sýat qurylǵylary úshin balama energııa kózderin qurý shyǵyndaryn qaıtarýdy qarastyrady. 2020 jylǵa deıin elimizdiń barlyq óńirlerinde 4 myńnan astam qudyq qazý josparlanǵan. Al ınvestıtsııalyq shyǵyndardy óteýge 28 mlrd. teńge kózdelip otyr. Munan bólek, shopandarǵa arnalǵan vagon, baspanaǵa ketken shyǵynnyń 40 paıyzyn sýbsıdııalaý qarastyrylǵan.