Úsh jylda urlanǵan aqshalaı qarajattyń tek 17% ǵana ótelgen - Bas prokýratýra

ASTANA. QazAqparat - QR Bas prokýrory Qaırat Qojamjarovtyń tóraǵalyǵymen Quqyq qorǵaý organdarynyń úılestirý keńesiniń otyrysy ótti. Onda esirtki qylmystaryna qarsy kúres jáne urlanǵan aktıvterdi qaıtarý máseleleri qaraldy, dep habarlaıdy QazAqparat QR Bas prokýratýrasyna silteme jasap.

Keńes otyrysyna Prezıdenttiń Kómekshisi - Qaýipsizdik Keńesiniń Hatshysy Ǵabıt Baıjanov, Úılestirý keńesiniń músheleri, Prezıdent Ákimshiligi men memlekettik organdardyń ókilderi qatysty.
Otyrysta qylmys arqyly memleketke keltirilgen zalaldy óteý jáne shetelden urlanǵan aktıvterdi qaıtarý boıynsha qabyldanyp jatqan sharalar qaraldy.
«2015 jyldan bastap urlanǵan aqshalaı qarajattyń tek 17% ǵana ótelgen.
Tergeý organdarynyń qyzmeti kúdiktilerdiń aktıvterin izdeýge jáne qamaýǵa alýǵa baǵyttalmaǵany aıtyldy. Prokýrorlar iriktep tekserý arqyly óz aktıvterin satqan jáne shyǵarǵan qylmyskerlerdiń múlkine tyıym salmaýdyń 86 faktisin anyqtady», - delingen habarlamada.
Adamdar jaýaptylyqtan bosatylǵan qylmystyq ister boıynsha tıisti talap-aryz jumysy joq.
Osyǵan baılanysty, Bas rokýror quqyq qorǵaý organdarynyń atyna urlanǵan qarajatty anyqtaý jáne memleket pen azamattarǵa qaıtarý boıynsha sharalar keshenin qabyldaý týraly tıisti nusqaý ázirleýdi tapsyrdy.
Ol ýákiletti vedomstvolardy da qylmystyq aktıvterdi izdeý men tutqyndaýdyń ozyq ádisterin, onyń ishinde sheteldik áriptesterdiń qarjylyq barlaý bólimsheleriniń málimetterin paıdalana otyryp, olardy neǵurlym belsendi qoldanýǵa shaqyrdy.
Ádilet mınıstrligine boryshkerlerdiń múlkin avtomatty túrde tekserý úshin ІT-júıesin jetildirýdi jedeldetý, sondaı-aq sot oryndaýshylarynyń jaýapkershiligin arttyrý mindeti qoıyldy.
Otyrys qorytyndysy boıynsha Úılestirý keńesiniń 2019 jyldyń 1-jartyjyldyǵyna arnalǵan jumys jospary bekitildi, onda Memleket basshysynyń tapsyrmalarynan týyndaıtyn jáne azamattardyń quqyqtaryn qorǵaýǵa baılanysty ózekti máseleler kózdelgen.