Úsh jylda qazaq halqynyń 42 paıyzy ashtyq qurbany boldy - Janseıit Túımebaev

NUR-SULTAN. QazAqparat - Qazaqstan halqy Assambleıasy Saıası qýǵyn-súrgin jáne asharshylyq qurbandaryn eske alý kúnine arnap keshendi is sharalar ótkizip jatyr, dep habarlaıdy QazAqparat tilshisi.

«Tarıhtan taǵylym - ótkenge taǵzym» degen atpen ótken keshendi is-shara bıyl Aqmola oblysynyń Aqmol aýylyndaǵy «ALJIR» memorıaldy-murajaı kesheninde bastaldy. Tańǵy saǵat 9.00-den bastap aza tutýǵa jınalǵan halyq eske alý taqtasyna gúl shoqtaryn qoıyp, saıası qýǵyn-súrgin qurbandarynyń rýhyna taǵzym etti.

Jınalǵan jalpy jurtqa «ALJIR» mýzeıiniń biregeı eksponattary kórsetilip, «ALJIR-diń jan tózgisiz yzǵary» atty derekti fılmi kórsetildi.

Sharada sóz sóılegen Qazaqstan halqy assambleıasy tóraǵasynyń orynbasary Janseıit Túımebaev úsh jylda, ıaǵnı 1931-1933 jyldarda halqymyzdyń 42 paıyzy qurban bolǵanyn aıtty.

«Asharshylyqtan keıingi 37-38 jyldardaǵy stalındik repressııa da halqymyz úshin óte aýyr soqqy boldy. Júz myńnan astam adamǵa «halyq jaýy» degen tańba taǵyldy. Olardyń kóbi atylyp ketti, qalǵandary lagerlerdiń bar azabyn bastan keshti. Qýǵyn-súrginge ushyraǵandardyń alǵy shebinde Alash arystary men qazaq zııalylary qurban boldy. Jazyqsyz qurbandar rýhyna bas ıip, taǵzym etý - barshamyzdyń paryzymyz», - dedi assambleıa hatshysy.

Eske alý sharalary keshke deıin jalǵaspaq. Saǵat.14.00-de Nur-Sultan qalasynda «1932-1933 jyldardaǵy asharshylyq qurbandarynyń monýmenti» eskertkishine gúl qoıý rásimi ótse, saǵat 17.00-de «Qazaq eline myń alǵys» monýmenti aldynda «Eske alý vahtasy» fleshmoby ótedi. Oǵan 250-den asa adam qatysady dep josparlanǵan.

Eske alý kúnin saǵat 19.00-de Q. Qýanyshbaev atyndaǵy Qazaq mýzykalyq-drama teatrynda bastalatyn Tbılısı memlekettik teatrynyń «ALJIR» spektakliniń qoıylymy túıindeıdi.