Úsh jylda 50 áskerı qyzmetshi sýıtsıd jasaǵan – senator másele kóterdi
«QR Bas áskerı prokýrorynyń aqparatyna sáıkes, sońǵy úsh jylda 237 áskerı qyzmetshi qaıtys bolǵan. 2020 jyly – 77, 2021 jyly - 96, 2022 – 64 adam. Olardyń 145-i – áskerge kelisimshartpen kelgender, 59-y – ofıtser, 31-i – soldat. Bul azamattardyń 89-y naýqastan kóz jumǵan, 62-si jol apatynan, 50-i sýıtsıdten, al 8 adam ózge sebepterden qaıtys bolǵan. Eń kóp, ıaǵnı 89 adam aýyryp kóz jumǵan. Budan kórip otyrǵanymyz áskerge shaqyrylatyn jastardyń densaýlyǵy Otan aldyndaǵy boryshyn óteýge jaramaıdy», - dedi ol.
Senator jaǵdaıdy jaqsartý úshin áskerge shaqyrylýshylardyń ǵana emes, jasóspirimderdiń de psıhologııalyq jaǵdaıyn baqylaý mańyzdy ekenin atap ótti.
«13-14 jastaǵy er balalardyń densaýlyǵy, tán saýlyǵy, psıhıkasy, psıhologııasy únemi baqylaýda bolýy kerek dep esepteımiz. Áskerge shaqyrý komıssııasynyń aldyna kelgenshe ol balanyń búkil psıho-fızıkalyq portreti, barlyq aqparat arnaıy elektrondy kitapshada jınalyp turǵany durys. Qazirgi kezde mindettelgen kvotany toltyrý úshin ásker qataryna densaýlyǵy joq bozbalalar da ketip jatyr», - dedi Dana Nurjigit.
Ol áskerı qyzmetshilerdiń qoǵamdaǵy mártebesin kóterýdiń mańyzdylyǵy jáne olardyń ál-aýqatyn jaqsartý týraly da aıtty. Munda kóptegen másele qordalanyp qalǵan.
«Qarýly kúshter qataryna kelisim-shart boıynsha qyzmetke kelgen soldattyń birinshi jyldaǵy jalaqysy – 82 myń teńge. Qazaqstan dárigerleriniń jalaqysy kóterilgende, elimizdiń áskerı dárigerleri bul úlesten qalys qalyp, búginde olardyń jalaqysy – 200 myń teńge. 2021 jyldan beri «Áskerı baspana» baǵdarlamasy aıasynda «Otbasy bank» alǵashqy jarnany 5 paıyzdan 20 paıyzǵa deıin ósirgen. Al, jalaqysy 100 myńǵa da jetpeıtin jas áskerı maman baspananyń alǵashqy 20 paıyzyn qalaı tólemek? Osydan keıin baryp, áskerı adamnyń qoǵamdaǵy mártebesi týraly qandaı sóz qozǵaýǵa bolady?!» - dedi depýtat.
Dana Nurjigit áskerge shaqyrylatyn jáne áskerge shaqyrylǵandardyń densaýlyǵyn saqtaý men qadaǵalaý, olardyń densaýlyǵynyń elektrondyq tirkelimin jasaý jáne áskerı qyzmetshilerdiń ál-aýqatyn jaqsartýǵa baılanysty vedomstvoaralyq yntymaqtastyqty nyǵaıtýdy kózdeıtin birqatar usynystar aıtty.
