Úsh jylda 30-dan asa tarıhı-mádenı muramen jumys isteý kózdelip otyr - «Qazqaıtajańǵyrtý» dırektory
ASTANA. QazAqparat - Bıyl Qazaqstan aýmaǵynda mańyzy zor 14 tarıhı eskertkish qalpyna keltiriledi. Bul týraly búgin Ortalyq kommýnıkatsııalar qyzmetindegi brıfıngte «Qazqaıtajańǵyrtý» Respýblıkalyq memlekettik kásipornynyń dırektory Qanat Tuıaqbaev málim etti.
«2015-2017 jyldarǵa arnalǵan úsh jyldyq josparymyzǵa sáıkes, 30-dan asa tarıhı-mádenı muramen jumys isteý kózdelgen. Solardyń ishinde 14 eskertkish bıyl qalpyna keltiriledi. Osy eskertkishterdiń bir-ekeýine toqtalar bolsam, IV-VII ǵasyrlarǵa jatatyn Besshatyr qorǵanyn tolyq qalpyna keltirý josparda bar»,-dedi ol.
Túrkistan, Saýran, Syǵanaq qalalary Qazaq handyǵynyń mańyzdy ortalyqtary bolǵanyna toqtalǵan Q. Tuıaqbaev, «Saýran qalasyndaǵy XV, XVI, XVII ǵasyrlarda salynǵan tarıhı-mádenı eskertkishterge zer salar bolsaq, qurylymdardyń kópshiligý oqý oryndaryna arnalǵan bolatyn. ıAǵnı, sol zamanda qabyrǵasy qalanǵan meshit-medreseler oqytý maqsatynda salynǵan. Saýran qalasynyń aýmaǵyndaǵy meshit-medreseler qalpyna keltirilip, ashyq aspan astyndaǵy mýzeıge aınalǵan»,-dedi.
Osy oraıda ol ózi basqaryp otyrǵan kásiporynnyń negizi jumysy - qazaq jerindegi tarıhı, mádenı eskertkishterdi saqtap qalý, qalpyna keltirý, olardy ashyq aspan astyndaǵy mýzeıge aınaldyrý, elimizge keletin sheteldik qonaqtarǵa qazaq tarıhyn, Qazaqstannyń eskertkishterin pash etý arqyly Qazaqstannyń sol zamannan bastap osy kezge deıingi tarıhynyń alatyn ornyn kórsetý ekenin atap ótti.
«2004 jyly Elbasynyń bastamasymen qabyldanǵan «Mádenı mura» baǵdarlamasynyń aıasynda 73-ten asa respýblıkalyq mańyzy bar tarıhı-mádenı rýhanııat eskertkishteri qalpyna keltirildi»,-dedi Qanat Tuıaqbaev.
