Úsh júzge tarta jolaýshy Almatydan Taılandqa usha almaı otyr
ALMATY. QazAqparat - Scat áýe kompanııasynyń Almaty - Taıland reısiniń jolaýshylary táýlik boıy Almaty áýejaıynan ushyp kete almaı otyr, dep habarlaıdy QazAqparat tilshisi.
VSV - 5051 Almaty - Phýket (Taıland) reısimen kele jatqan Sunday Airlines (Scat á/k) áýe kompanııasynyń 290 jolaýshysy Almaty áýejaıynan táýlik boıy ushyp kete almady.
Jolaýshylardyń aıtýyna qaraǵanda, reıs tańerteń saǵat 05:20 kezinde ushyp shyǵýy kerek bolatyn. Alaıda ushyp shyǵý ýaqytyn birneshe ret shegergen. Arada kóp ótpeı reısti taǵy da belgisiz ýaqytqa ysyryp tastaǵan.
«Biz ótken jyldyń sońynda jarymyz ekeýmiz Taılandqa barýdy sheshken edik. Jospar boıynsha saǵat beste ushyp shyǵýymyz kerek edi. Alaıda ushyp shyǵý ýaqytyn birneshe ret keıinge ysyrdy. Áý basta reıs saǵat 8:00-ge, keıin 15:00-ge, odan soń tipti 23:00-ge shegerdi. Biz munda 150-ge tarta jolaýshymyz. Onyń otyzy Qyrǵyzstan azamaty. Bárimiz shýlap talap etkennen keıin ǵana áýe kompanııasy bizdi áýejaıǵa jaqyn jerdegi qonau úıge ornalastyrdy», - deıdi reıs jolaýshylarynyń biri.
Týrısterge Taılandtaǵy áýejaı jóndeý jumystaryna baılanysty áýe kemesin qabyldaı almaıtyny habarlanǵan.
«Keıin ushaqtyń tehnıkalyq turǵyda daıyn emes ekeni anyqtaldy. Reıstiń bulaı shegerilýiniń negizdemesi mazamyzdy ketirip tur. Bárine qoldy silteı salyp, keri qaraı Astanaǵa ushyp ketýge bolatyn edi. Biraq, demalys kezinde josparlaǵanymyzdaı, Taılandqa baryp, demalǵymyz keledi», - deıdi ol.
Scat áýe kompanııasynan habarlanǵandaı, Almaty - Phýket reısiniń ýaqytynda oryndalmaýy - Phýket áýejaıynyń ushý-qoný jolynyń jabylýymen baılanysty bolyp otyr.
«160 jolaýshy áýejaıǵa jaqyn jerdegi qonaq úıge ornalastyrdy. Olarǵa qajetti kerek-jaraqtardyń bári de usynyldy. Al qalǵandary qaıtyp, óz úılerine qonýdy sheshti. Áýe kompanııasy keltirilgen yńǵaısyzdyqqa baılanysty keshirim suraı otyryp, bolǵan jaıǵa túsinistik tanytýdy suraıdy», - delingen áýe kompanııasynyń baspasóz qyzmetiniń habarlamasynda.
Ýaqtyly oryndalmaǵan reıs jolaýshylaryna áýe kompanııasynyń esebinen ótemaqy tólenedi.
Scat áýe kompanııasy Taılandtaǵy áýejaıǵa qonýǵa bolatyny týraly ruqsat berilgennen keıin birden jolaýshylarǵa habarlaıtyn bolady.
