Úsh jol jobasyna 3 trln teńgege jýyq qarajat bólindi
ASTANA. KAZINFORM — Premer-mınıstrdiń birinshi orynbasary «Aqtóbe – Ulǵaısyn» joly ýchaskesiniń ashylý rásimine qatysty. Bul týraly Úkimettiń baspasóz qyzmeti habarlady.
Premer-mınıstrdiń birinshi orynbasary Nurlybek Nálibaev Úkimet jetekshisiniń tapsyrmasymen Aqtóbe oblysyna jumys saparymen baryp, «Aqtóbe — Ulǵaısyn» avtojolynyń 791-819-shy shaqyrymdar aralyǵyndaǵy 28 shaqyrymdyq ýchaskesiniń ashylý rásimine qatysty. Bul jol — «Batys Eýropa — Batys Qytaı» halyqaralyq kólik dáliziniń mańyzdy baǵyty.
- Bıyl tamyzda Memleket basshysy Qasym-Jomart Toqaev Aqtóbe, Mańǵystaý jáne Qyzylorda oblystaryndaǵy úsh iri jol jobasynyń qurylysyn telekópir arqyly bastap berdi. Olar — „Aqtóbe — Ulǵaısyn“, „Ulǵaısyn — Sekseýil“ jáne „Sekseýil — Qyzylorda“ baǵyttary. „Aqtóbe — Ulǵaısyn“ baǵytynda 262 shaqyrym jol qaıta jańǵyrtylyp, tehnıkalyq sanaty ekinshiden birinshi sanatqa kóteriledi. Sonymen qatar Sekseýil men Beıneý aralyǵynda qumdy alqap arqyly jańa jol salynýda. Úsh jobaǵa 3 trln teńgege jýyq qarajat bólinip, 1900 shaqyrymnan astam joldy salý jáne jańǵyrtý josparlanǵan. Jumystardyń barlyǵyn aldaǵy úsh jyl ishinde aıaqtaý kózdelgen. Osy rette merdiger uıymdardyń aldyna jumysty merziminen buryn aıaqtaýǵa bar kúsh-jigerin jumsaý mindeti qoıylýda, — dedi Nurlybek Nálibaev.
Jol qurylysynyń sapasyn qamtamasyz etý úshin Premer-mınıstrdiń tapsyrmasymen arnaıy komıssııa quryldy. Onyń quramyna ǵalymdar, jol salasynyń mamandary, memlekettik organdardyń ókilderi men depýtattar endi. Komıssııa qurylys kezinde qoldanylatyn bıtým, qıyrshyq tas jáne ózge de materıaldardyń sapasyn, sondaı-aq aýyr júk kólikteriniń jolǵa túsiretin salmaǵyn retteý máselelerin qarastyrady.
Birinshi vıtse-premer jol sapasyna qoıylatyn talaptardy kúsheıtý kólik qozǵalysynyń qaýipsizdigin arttyrýǵa baǵyttalǵanyn aıtty.
Tórt jolaqty qozǵalys bóligi kólikterdiń qarsy baǵytqa shyǵyp ketý qaýpin tómendetip, qaýipsizdikti arttyrady. Budan bólek, qys mezgilinde jolda qalǵan júrgizýshilerge kómek kórsetý úshin arnaıy tehnıka men qutqarý quraldary alynýda.
Qozǵalys ashylǵan 28 shaqyrym ýchaskede negizgi qurylys jumystary aıaqtaldy. Aldaǵy eki aptada jaryqtandyrý qurylǵylary men jol qorshaýlaryn ornatý josparlanǵan. Jolǵa sapaly qurylys materıaldary paıdalanylsa, negizi berik bolyp, uzaq merzimge jaraıdy.
«Sıne Mıdas Stroı» JShS zerthanasynyń basshysy Jánibek Medetovtiń aıtýynsha, mamandar aldymen karerden jetkizilgen topyraqtyń sapasyn tekseredi. Zertteý barysynda materıaldyń maksımaldy tyǵyzdyǵy men ylǵaldylyǵy anyqtalady. Qıyrshyq tastyń 10-20 mm jáne 5-10 mm fraktsııalary da arnaıy elek arqyly tekseriledi. Budan bólek, materıaldardyń tyǵyzdyǵy men aıazǵa tózimdiligi zertteledi. Belgilengen talaptarǵa sáıkes kelmeıtin materıaldar suryptalyp, qurylysqa paıdalanylmaıdy. Zerthanada asfalt qospasy men bıtýmnyń sapasy da tekseriledi. Zaýyttan jetkizilgen asfalt qospalary men tóselgen joldan alynǵan kern úlgileri arnaıy prester men vakýýmdyq qondyrǵylar arqyly synalady.
Mamandar bıtýmnyń joǵary jáne tómen temperatýraǵa tózimdiligin, sozylǵyshtyǵy men tyǵyzdyǵyn baǵalaıdy. Materıaldyń 50°S jáne 0°S gradýs temperatýradaǵy qasıetteri zerttelip, belgilengen talaptarǵa sáıkestigi anyqtalady. Qazirgi ýaqytta kompanııa zerthanasynda 10 adam jumys isteıdi.
Іs-sharada jol qurylysyna paıdalanylatyn tehnıka men jabdyqtar tanystyryldy.
Aıta ketelik Qaraǵandy — Jezqazǵan avtojolynda 2,2 mln tekshe metrden astam topyraq tóseý jumystary oryndalǵan edi.
