Úsh jyldyń ishinde Qazaqstan jańa turpatty el boldy – Prezıdent

BÝRABAI. KAZINFORM – Úsh jylda saıası reformalar jan-jaqty ózgerister jasaýǵa múmkindik berdi. Bul týraly Býrabaıda ótip jatqan Ulttyq quryltaıdyń IV otyrysynda Memleket basshysy Qasym-Jomart Toqaev málim etti.

- Eń aldymen búgin Amal kúni barshańyzǵa qutty bolsyn degim keledi. Qystan aman-esen shyǵyp, aǵaıyn-baýyrmen kórisý – ejelden kele jatqan ata dástúrimiz. Bul kún – Áz-Naýryzdyń bastaýy. Elimizdiń tól merekesi bıyl da qasıetti Oraza aıyna oraılas kelip otyr. Qasterli meıramdarymyz halqymyzdy ıgi amaldar jasaýǵa úndeıdi. Asyl qasıetterimizdi keńinen dáripteıdi. Quryltaıdyń ulyq merekelermen qatar ótip jatqany – jaqsylyqtyń nyshany, - dedi Qasym-Jomart Toqaev.

Memleket basshysy osydan úsh jyl buryn naýryz aıynda arnaıy Joldaý jarııalaǵanyn eske saldy.

- Elimizdi túbegeıli jańǵyrtý úshin aýqymdy reforma jasaıtynymyzdy aıttym. Sol kezde alǵash ret Ulttyq quryltaı týraly bastama kóterdim. Úsh jyldyń ishinde Qazaqstan jańa turpatty el boldy. Saıası reformalar jan-jaqty ózgerister jasaýǵa múmkindik berdi. Jalpyhalyqtyq referendým arqyly Ata zańǵa túzetýler engizildi. Parlamenttiń quzyry keńeıdi, Úkimettiń jaýapkershiligi artty. Adam quqyqtaryn qorǵaý júıesi jaqsardy. Konstıtýtsııalyq sot quryldy. Sheshim qabyldaý úderisine azamattardyń belsene qatysýyna jol ashyldy. Basqa da baǵyttarda mańyzdy reformalar jasaldy, - dedi Prezıdent.

Budan buryn habarlanǵandaı, Býrabaıda Prezıdent Qasym-Jomart Toqaevtyń qatysýymen Ulttyq quryltaıdyń IV otyrysy bastaldy.