Úsh jyldyq bıýdjet jobasy Quryltaı qaraýyna engizildi
ASTANA. KAZINFORM — Aldaǵy úsh jylǵa arnalǵan respýblıkalyq bıýdjet jobasy Quryltaı qaraýyna tústi. Bul týraly Quryltaı tóraǵasynyń orynbasary Dánııa Espaeva aıtty.
Onyń aıtýynsha, depýtattar bıýdjet jobasyn talqylaýǵa qatysyp qana qoımaı, oǵan usynystaryn da engize alady.
— Quryltaıǵa túsken bıýdjet jobasy qazirdiń ózinde belgili bir ákimshiler men baǵdarlamalar boıynsha bólingen. Eger talqylaý barysynda depýtat túzetý engizip, mysaly, ákimshini ózgertýdi usynsa nemese bıýdjettegi qandaı da bir baǵytty tıimsiz ne orynsyz dep sanasa, tıisti usynysyn engizýge quqyly, — dep túsindirdi Dánııa Espaeva.
Vıtse-spıkerdiń sózine qaraǵanda, depýtattar jekelegen baǵytqa, onyń ishinde óńirlerdiń qajettilikterine qosymsha qarajat bólýdi de usyna alady.
— Mundaı jaǵdaı jıi kezdesedi. Ádette óńirlerden saılanǵan depýtattar óz oblystaryn qarjylandyrý kólemin arttyrýǵa qatysty túzetýler engizedi. Mundaı usynys tirkelip, jumys toby tarapynan qaralady. Bıýdjetti qaraý úshin arnaıy jumys toby qurylady, — dedi Quryltaı tóraǵasynyń orynbasary.
Ol depýtattardyń usynystary Bıýdjet kodeksiniń talaptaryna sáıkes bolýy kerektigine nazar aýdartty.
— Respýblıkalyq bıýdjet — asa mańyzdy, naqty esepteýdi qajet etetin qujat. Sondyqtan depýtattardyń ózine de belgili bir talap qoıylýy kerek. Usynys engizý nemese talqylaýǵa qatysý kezinde mindetti túrde Bıýdjet kodeksine súıený qajet. Sol sebepti qazir jumys toptaryn qalyptastyra otyryp, depýtattarymyzdy Bıýdjet kodeksimen tanystyrýǵa arnalǵan arnaıy is-sharalar ótkizýdi josparlap otyrmyz, — dedi ol.
Esterińizge sala ketsek, osy jyldyń 25 tamyzynda Úkimet úsh jylǵa arnalǵan respýblıkalyq bıýdjet týraly zań jobasyn bekitken edi.
