Úsh jylda Túrkııaǵa 700 myń tonna ósimdik sharýashylyǵy ónimi eksporttaldy — AShM
ASTANA. KAZINFORM — Búgin Májilistiń jalpy otyrysynda «Qazaqstan Úkimeti men Túrkııa Úkimeti arasyndaǵy ósimdikter karantıni jáne olardy qorǵaý salasyndaǵy yntymaqtastyq týraly kelisimdi ratıfıkatsııalaý týraly» Zańy qabyldandy.
— Ósimdikter karantıni salasyndaǵy halyqaralyq yntymaqtastyq elder arasynda ótkiziletin ónimge karantındik fıtosanıtarııalyq baqylaý júrgizýde mańyzdy ról atqarady. Kelisimde karantınge jatqyzylǵan ónimderdi ótkizý kezinde bizdiń elderimizge qolaıly fıtosanıtarııalyq qaýipsizdikti qamtamasyz etý úshin qajet ózara yntymaqtastyqtyń negizgi tustary eskerildi. Mysaly, zertteý ári dıagnostıkalaý tájirıbesimen almasý bóliginde ósimdikter karantıni jónindegi ǵylymı uıymdar arasyndaǵy yntymaqtastyqty júzege asyrý, ósimdikter karantıni salasyndaǵy jańa normatıvtik-quqyqtyq aktiler jáne karantındik zııandy organızmderdiń ulttyq tizbeleri týraly aqparat almasý. Sondaı-aq, karantınge jatqyzylǵan ónimniń ákelinetin partııalaryna, ilespe qujattarǵa jáne tasymaldanatyn júkterdiń tranzıt sharttaryna qatysty talaptar qarastyrylǵan, — dedi QR Aýyl sharýashylyǵy vıtse-mınıstri Ermek Kenjehanuly.
Onyń aıtýynsha, Túrkııadan ımporttalatyn negizgi karantınge jatqyzylǵan ónimderdiń arasynda jańǵaq, qyzanaq, burysh, alma, tsıtrýs túrleri, jańa pisken jıdekter, jemis jáne gúl daqyldarynyń kóshetteri qamtylǵan. Bul rette Qazaqstannan eksporttalatyn negizgi karantınge jatqyzylǵan ónimder sanatynda dándi daqyldardyń (bıdaı, arpa, suly, kúnbaǵys), burshaq daqyldarynyń (burshaq, jasymyq, noqat) barlyq túrleri qarastyrylǵan.
— Úsh jyl ishinde Túrkııaǵa 700 myń tonnaǵa jýyq ósimdik sharýashylyǵy ónimi eksporttaldy, al ımport 40 myń tonnadan astam túrli aýyl sharýashylyǵy daqyldaryn jáne 2,7 mln dana tuqym men otyrǵyzý materıaldaryn qurady. Eki el arasynda tasymaldanatyn karantınge jatqyzylǵan ónim fıtosanıtarııalyq karantındik baqylaýdan ótedi. Úsh jyldyq kezeńde Túrkııadan ákelingen karantınge jatqyzylǵan ónimge, ıaǵnı karantındik fıtosanıtarııalyq baqylaý júrgizý kezinde talaptarǵa sáıkes kelmeıtin 76 jaǵdaı anyqtaldy. Onyń ishinde 6 jaǵdaıda karantındik nysan anyqtaldy. Sonymen qatar, tasymaldanǵan karantınge jatqyzylǵan ónim kóleminiń ulǵaıýyn eskersek, olardyń taralyp ketýi eki el aýmaǵyndaǵy fıtosanıtarııalyq jaǵdaıǵa teris áserin tıgizedi. Kelisimdi ratıfıkatsııalaý jónindegi zań jobasyn qabyldaý eki eldiń ósimdikter karantıni jónindegi qyzmetterine odan ári yntymaqtastyqty damytýdy jańa deńgeıge shyǵarýǵa múmkindik beredi, — dedi vıtse-mınıstr.
Onyń sózine qaraǵanda, zań jobasyn qabyldaý teris áleýmettik-ekonomıkalyq, quqyqtyq saldarǵa ákep soqpaıdy jáne respýblıkalyq bıýdjetten qosymsha qarjylyq shyǵyndardy talap etpeıdi.
Eske salsaq, byltyr kúzde Úkimette fıtosanıtarııalyq baqylaý júıesin reformalaý jobasy tanystyryldy.