Úsh jylda sý salasyndaǵy uzaqqa sozylǵan jobalar sany eki esege azaıdy
ASTANA. KAZINFORM — Sý sharýashylyǵy salasyndaǵy uzaq jyl boıy aıaqtalmaǵan jobalardyń sany sońǵy úsh jylda eki esege jýyq qysqardy.
Sý resýrstary jáne ırrıgatsııa mınıstrligi qurylǵannan beri sý sharýashylyǵy nysandaryn salý jáne rekonstrýktsııalaý boıynsha uzaq jyl boıy aıaqtalmaı kele jatqan jobalardyń sany 47%-ǵa, ıaǵnı eki esege jýyq qysqardy.
2020-2022 jyldary Sý sharýashylyǵy komıtetiniń balansynda uzaq jyldar boıy iske asyrylmaǵan 19 joba bolǵan. Olardyń aıaqtalý merzimi jumystardyń tolyq oryndalmaýy, jobalaý-smetalyq qujatty túzetý qajettiligi, sot protsesteri jáne basqa da sebepterge baılanysty sozylyp ketken.
Komıtet bekitken «Gıdrotehnıkalyq qurylystardy salý jáne rekonstrýktsııalaý boıynsha uzaq jyldar boıy aıaqtalmaǵan jobalardy aıaqtaý algorıtmi» aıasynda kezeń-kezeńimen júrgizilgen jumystardyń nátıjesinde mundaı jobalardyń sany 19-dan 10-ǵa deıin qysqartyldy.
Máselen, 2024 jyldyń qorytyndysy boıynsha Sý sharýashylyǵy komıteti 2020 jyly toqtatylǵan Qyzylorda gıdrotorabyn rekonstrýktsııalaý jobasyn aıaqtady. Al 2025 jyldyń qorytyndysy boıynsha Jezqazǵan qalasyndaǵy Esqula sý qubyryn salý jobasy aıaqtaldy.
Qalǵan 10 jobany aldaǵy eki jyl ishinde aıaqtap, paıdalanýǵa berý josparlanyp otyr. Olardyń qatarynda Almaty oblysyndaǵy Súmbe ózenindegi sý alý qurylysyn rekonstrýktsııalaý, Aqmola oblysyndaǵy Preobrajenskıı gıdrotoraby men Sileti sý qoımasyn rekonstrýktsııalaý, Abaı oblysyndaǵy Qýsaq ózenindegi gıdrotorapty rekonstrýktsııalaý, sondaı-aq Qyzylorda sol jaǵalaýy magıstraldyq kanalynyń gıdrotehnıkalyq qurylystaryn, Túrkistan oblysyndaǵy Qyzylqum magıstraldyq kanaly men K-26, K-28 jáne K-30 kanaldaryn rekonstrýktsııalaý jobalary bar.
— Jalpy, mınıstrlik qurylǵannan bergi úsh jyl ishinde sý sharýashylyǵyn basqarýdyń fragmentti tásilinen sý qaýipsizdigi salasyndaǵy keshendi memlekettik saıasatqa kóshý júzege asyryldy. Osylaısha, jeke mınıstrliktiń qurylýy sý sharýashylyǵy ınfraqurylymyn jańǵyrtý qarqynyn edáýir jedeldetýge, sýdy paıdalaný boıynsha baqylaýdy kúsheıtýge, sý únemdeý tehnologııalaryn engizý qarqynyn arttyrýǵa jáne elimizdiń sý qaýipsizdigin qamtamasyz etýdiń uzaq merzimdi júıesin qalyptastyrýǵa múmkindik berdi, — dedi Sý resýrstary jáne ırrıgatsııa mınıstri Nurjan Nurjigitov.
Aıta ketelik Shardara sý qoımasynda sýdy esepteý júıesi jańǵyrtylǵan edi.
