Úsh jylda memlekettik jer qoryna 13,2 mln gektar jer qaıtaryldy

ASTANA. KAZINFORM – Paıdalanylmaı jatqan 11 mln gektar jaıylym memleket menshigine qaıtaryldy. Bul týraly Aýyl sharýashylyǵy vıtse-mınıstri Azat Sultanov aıtty.

- 2022 jylǵy 1 qyrkúıekte Qazaqstan Prezıdentiniń bergen tapsyrmasyna sáıkes, paıdalanylmaı jatqan nemese zań buzý derekterimen berilgen jerlerdi qaıtarý boıynsha jumys atqarylyp jatyr. Osy baǵytta arnaıy Respýblıkalyq komıssııa quryldy. 2024 jylǵy qyrkúıekten bastap Komıssııa jumysy jerdi ádil qaıta bólýge, topyraqtyń tozýy jáne jaıylym tapshylyǵy máselesin sheshýge qaıta baǵdarlandy. Quqyq qorǵaý organdary jáne «AMANAT» partııasy janyndaǵy «Jer Amanaty» komıssııasysynyń belsendi jumys isteýi ashyqtyq pen tıimdilikti qamtamasyz etip otyr. Bul turǵyda úsh jyl ishinde aýqymdy jumys atqarylyp, memlekettik jer qoryna 13,2 mln gektar jer qaıtaryldy (2022 jyly – 5,4 mln ga, 2023 jyly – 4,6 mln ga, 2024 j. – 2,2 mln ga, 2025 jyldyń basynan – 1 mln ga), onyń ishinde 11 mln gektary – jaıylym. Bul jaıylymdarda 14,6 myń sharýashylyqtyń maly bolmaǵan nemese jaıylymǵa túsetin júkteme tómen bolǵan, - dedi A. Sultanov Parlament Májilisinde «Jaıylym týraly» Zańynyń iske asyrylýyn talqylaý barysynda.

Onyń aıtýynsha, osy jerlerdiń 6 mln gektary halyqqa qaıta bólindi.

- Atap ótý qajet, 2024 jyly «Jaıylymdar týraly» Zań aıasynda engizilgen túzetýlerdiń biri — jaıylymdardy alyp qoıý normasyn shekti júktemeni 20%-dan 50%-ǵa deıin ulǵaıtý boldy. Osy túzetý kúshine engen sátten bastap, 2,7 mıllıon gektar utymsyz paıdalanylǵan jaıylymdar qaıtaryldy. Onyń ishinde 565,8 myń gektar boıynsha fermerler jappaı mal satyp alyp, óndiristik protsesterge adamdardy kóbirek tarta bastady. Jumys jalǵasyp jatyr, 63,8 myń gektar boıynsha sot protsesteri júrgizilip otyr, - dedi vıtse-mınıstr.

Buǵan deıin habarlanǵandaı, mınıstrik jaıylym tapshylyǵy eki esege azaıǵanyn málim etti.