Úsh jylda geologııalyq barlaý jumystaryna shamamen 500 mln dollar ınvestıtsııa salynady - Bektenov
ASTANA. KAZINFORM — Úsh jylda geologııalyq barlaý jumystaryna shamamen 500 mln dollar ınvestıtsııa salynady. Bul týraly Memleket basshysy Qasym-Jomart Toqaevtyń tóraǵalyǵymen ótip jatqan Úkimettiń keńeıtilgen otyrysynda Premer-mınıstr Oljas Bektenov aıtty.
- Óńdeý salasyna keletin ınvestıtsııa kóleminiń turaqty ósýi úshin ekonomıkany shıkizatpen qamtamasyz etý mańyzdy. Ótken kezeńdegi derekter negizinde qalyptasqan resýrstyq baza sarqylyp bitýge jaqyn. Sondyqtan geologııalyq barlaý jumystaryn damytýǵa erekshe kóńil bólinedi. Ótken jyly 1:200 000 masshtabtaǵy keńestik kezeńde jasalǵan qoldanystaǵy kartanyń ornyna 1:50 000 masshtabtaǵy geologııalyq kartany ázirleý jumystary bastaldy. Sizdiń tapsyrmańyzǵa sáıkes, aldaǵy 3 jylda memleket tarapynan geologııalyq barlaý jumystaryna shamamen 500 mln dollar ınvestıtsııa salynatyn bolady. Salystyrý úshin aıta ketsek, sońǵy 30 jylda bul salaǵa barlyǵy 760 mln dollar jumsalǵan, - dedi Oljas Bektenov.
Onyń atap ótýinshe, nátıjesinde perspektıvasy joǵary ýchaskelerde seısmıkalyq synaqtardan bastap aerogeofızıkalyq zertteýlerge deıin barlyǵy 100 myń sharshy shaqyrym aýmaq zertteledi. Keıin ár jyl saıyn qosymsha 30 myń sharshy shaqyrym aýmaqta barlaý jumystary júrgiziletin bolady.
- Mundaı aýqymdy barlaý jumystaryn júrgizý úshin kóptegen salalyq mamandar qajet. Ókinishke oraı, biz mundaı mamandardyń qataryn azaıtyp aldyq. Bul olqylyqtyn ornyn toltyratyn bolamyz. Memleket qarjysynan bólek, geologııalyq barlaýǵa jeke ınvestıtsııalar da tartylýda. 2023 jyldan beri onyń kólemi 500 mln dollardan asty. Bizdiń basty maqsatymyz – otandyq kásiporyndar úshin shıkizat bazasyn aıtarlyqtaı keńeıtip, ony tereń óńdeýge múmkindik jasaý, - dedi Úkimet basshysy.
Buǵan deıin Premer-mınıstr óńdeý ónerkásibiniń qazirgi ósý qarqyny ekonomıkany tolyqqandy ártaraptandyrý úshin jetkiliksiz ekenin aıtqan edi.
