Úsh jylda geologııalyq barlaý salasyna 280 mlrd teńge jeke ınvestıtsııa tartyldy
ASTANA. KAZINFORM – Úsh jylda geologııalyq barlaý salasyna 280 mlrd teńge jeke ınvestıtsııa tartyldy. Bul týrady GECA 2026 halyqarlyq geologııalyq forýmynyń jalpy otyrysynda Premer-mınıstr Oljas Bektenov aıtty.
- Memleket basshysy Qasym-Jomart Kemeluly Toqaev geologııa jáne jer qoınaýyn paıdalaný salasyn damytýǵa erekshe kóńil bóledi. Prezıdent tapsyrmasy boıynsha ınfraqurylymdy jaqsartýǵa jáne qolaıly ınvestıtsııalyq orta qalyptastyrýǵa baǵyttalǵan aýqymdy reformalar iske asyrylyp jatyr, - dedi Oljas Bektenov.
Onyń aıtýynsha, jer qoınaýyn paıdalanýdyń biryńǵaı platformasynyń iske qosylýy mańyzdy qadam boldy. Ol kórsetiletin qyzmetterdiń ashyqtyǵy men qoljetimdiligin qamtamasyz etti.
- «Birinshi keldi – birinshi aldy» qaǵıdaty boıynsha álemdik ozyq tájirıbe negizinde jer qoınaýyn paıdalaný quqyǵyn berý protsesi aıtarlyqtaı jeńildetildi. Bul sońǵy úsh jylda geologııalyq barlaý salasyna shamamen 280 mlrd teńge kóleminde jeke ınvestıtsııalar tartýǵa múmkindik berdi. Paıdaly qazbalardyń qorlary boıynsha halyqaralyq eseptilik standarttary engizildi. Geologııalyq zertteý tásilderin odan ári jetildirý úshin 1:50 000 masshtabtaǵy geofızıkalyq kartalardy ázirleý qolǵa alyndy, - dedi Premer-mınıstr.
Aıta keteıik, keshe forýmnyń birinshi kúninde Energetıka vıtse-mınıstri Erlan Aqbarov elimizde geologııalyq barlaýǵa salynǵan ınvestıtsııa kólemi 433 mlrd teńgege jetkenin atap ótti.
