Úsh jylda eldi mekender aýmaǵynda 15 mln aǵash otyrǵyzý jospary qanshalyqty oryndaldy
ASTANA. KAZINFORM – Búgin Parlament Májilisindegi dóńgelek ústel otyrysynda Ekologııa jáne tabıǵı resýrstar mınıstrligi Orman sharýashylyǵy jáne janýarlar dúnıesi komıtetiniń tóraǵasy Danııar Turǵambaev elimizde aǵash otyrǵyzý tapsyrmasynyń oryndalý barysyn túsindirdi.
«Aýyl sharýashylyǵyna arnalǵan jerlerde agroorman-melıoratsııalyq is-sharalary egistikterdi, alqaptardy saqtaý úshin qoldanylyp keledi. ıAǵnı aýyl sharýashylyǵy ónimderin arttyrýǵa, topyraq qunarlyǵyn qalpyna keltirýge yqpal etedi. Prezıdent Qasym-Jomart Toqaev 2020 jylǵy Qazaqstan halqyna Joldaýynda 5 jylda orman alqaptarynda 2 mlrd túp aǵash otyrǵyzý týraly tapsyrma bergen. Bul rette, oblys ákimdikteri 1 mlrd 367 mln kóshet, mınıstrliktiń vedomstvolyq baǵynyshtaǵy uıymdary 432 mln jáne tabıǵat paıdalanýshylar 201 mln kóshet otyrǵyzýy josparlanǵan. Aǵash otyrǵyzý jumystaryna qoǵamdyq monıtorıngti júzege asyrý úshin ınteraktıvti karta jasaldy», - dedi D. Turǵambaev.
Onyń aıtýynsha, Memleket basshysynyń eldi mekender aýmaǵynda 15 mln tal egý tapsyrmasyn oryndaý maqsatynda oblystardyń, Astana men Almaty, Shymkent qalalarynyń eldi mekenderin kógaldandyrý men jasyl aımaqtardy qurýdyń óńirlik josparlary bekitildi.
«2021 jyldan bastap 2025 jylǵa deıin qalalar men eldi mekenderde 15 mln aǵash, sonyń ishinde jyl saıyn 3 mln túp tal egý josparlanǵan. Ákimdikterdiń derekterine qaraǵanda, 2021-2023 jyldary eldi mekenderde 10,3 mln aǵash otyrǵyzyldy», - dedi komıtet basshysy.
Onyń sózine qaraǵanda, úsh jylda Araldyń qurǵaǵan jerinde 500 myń gektardan astam alqapta orman melıoratsııalyq jumystary oryndaldy.
«2021 jyly Memleket basshysy ekologııalyq jaǵdaıdy jaqsartý maqsatynda 2025 jylǵa deıin Aral teńiziniń qurǵaǵan tabanynda sekseýil ekpelerin otyrǵyzý jolymen jalpy aýdany 1,1 mln ga orman melıoratsııalyq jumystaryn júrgizý mindetin qoıdy. 2021 jyldan bastap 2023 jylǵa deıin Aral teńiziniń qurǵaǵan tabanynda 545 myń ga alqapta orman melıoratsııalyq jumystary júrgizildi. Sonymen birge, 2024 jyly ormandy keńeıtý jumystary 275 myń ga, 2025 jyly 280 myń ga alańda júrgizý josparlandy», - dedi Danııar Turǵambaev.
