Úsh jylda bıýdjet tapshylyǵyn eki esege jýyq tómendetemiz — Oljas Bektenov

ASTANA. KAZINFORM — Premer-mınıstr Oljas Bektenov Parlament palatalarynyń birlesken otyrysynda bıýdjet tapshylyǵyn qalaı tómendetetinderin aıtty.

— Jalpy ekonomıkalyq ahýal turaqty. Biraq siz aıtyp ótken máseleler joq emes, bar. Olar bir kúnde paıda bolǵan másele emes, birneshe jyldar boıy qalyptasyp jatqan problema. Úkimet onyń bárin sheshý úshin belsendi jumys atqaryp jatyr. Úkimettiń bastamasymen elimizde salyq reformasy júrip jatyr. Osy jýyrda ǵana jańa Salyq kodeksi qabyldandy. Jańa Salyq kodeksiniń arqasynda biz kelesi jyldan bastap respýblıkalyq bıýdjetke shamamen 3 trln teńgeden astam qosymsha túsim túsedi dep esepteımiz. Bul aqshanyń bári tek damý maqsattaryna baǵyttalady. ıAǵnı kezekte ınfraqurylymdyq nysandardy iske qosý, elektr qýaty kózderin, avtomobıl jáne temirjol jelisin damytý, ınjenerlik jelilerdi jańǵyrtý sııaqty óte mańyzdy mindetterge joldanady. Bul salalar uzaq merzimdi, turaqty ekonomıkalyq ósimdi qamtamasyz etýge negiz qalaıdy, — dedi ol depýtat Erlan Saırovtyń suraǵyna bergen jaýabynda.

Aıtýynsha, Úkimet osy baǵyttarda belsendi ári tıimdi jumys jasasa, elimizde turaqty ekonomıkalyq ósim bolady.

— Osynyń nátıjesinde salyq bazasy keńeıip, respýblıkalyq bıýdjetke qosymsha qaıtadan túsimder túsedi. Sonyń arqasynda memleket óz mindettemelerin ári qaraı da mindetti túrde oryndaıdy. Qazir biz kelesi 3 jylǵa arnalǵan respýblıkalyq bıýdjet jobasyn daıyndap jatyrmyz. Óte qyzý jumys júrip jatyr. Aldyn ala aıtatynym, biz 2026 jyly bıýdjet tapshylyǵyn qazirgi 2,7 paıyzdan 2,5 paıyzǵa deıin, 2027 jyly 1,8 paıyzǵa deıin, 2028 jyly 1,4 paıyzǵa deıin tómendetemiz dep josparlap jatyrmyz, — dedi Úkimet basshysy.

Aıta keteıik, Úkimet úıinde Parlament palatalarynyń birlesken otyrysy ótip jatyr.