Úsh jylda aýyldarda 180 mektep salynady – Úkimet otyrysy

ASTANA. KAZINFORM – Aýyldyq aýmaqtardy damytý tujyrymdamasy sheńberinde 2027 jylǵa deıin 180-ge jýyq mektep salý josparlanǵan. Bul týraly QR Premer-mınıstri Oljas Bektenov aıtty.

Úkimet basshysy qazir aýyl mektebi – tek bilim ordasy ǵana emes, jergilikti halyq úshin mádenıet oshaǵyna, rýhanı ortalyqqa aınalǵanyn, Memleket basshysy aýyl mektepterin damytýǵa erekshe kóńil bólip otyrǵanyn atap ótti.

Bıyl «Jaıly mektep» ulttyq jobasyn qosa alǵanda, aýyldarda 42 mektep paıdalanýǵa berildi.

«Sońǵy úsh jylda aýyldarda 2,5 myńǵa jýyq mektep jańǵyrtyldy. Oqytý jaǵdaılaryn jaqsartý jáne jaıly orta qurý maqsatynda 800-den astam mektepti qaıta jańartý jumysy júrgizilip jatyr. Sondaı-aq aýyl mektepteri úshin 4 myńnan astam pándik kabınet satyp alyndy. Oqý-aǵartý mınıstrligi jyl sońyna deıin óńirlerge mektepterdi qaıta jańartýdyń biryńǵaı talaptaryn usynýy kerek. Onda bilim oshaqtaryn kúrdeli jóndeý ǵana emes, pándik synyptarmen jabdyqtaý máselesi de qaralýǵa tıis», - dedi O.Bektenov Úkimet otyrysynda.

Aýylǵa bilikti pedagogterdi tartý maqsatynda laýazymdyq jalaqyǵa 25% mólsherinde qosymsha aqy kózdelgen.

Sondaı-aq, «Dıplommen aýylǵa» baǵdarlamasy sheńberinde pedagogterge kóterme járdemaqy tólenedi, sondaı-aq turǵyn úı satyp alýǵa nemese salýǵa tıimdi nesıeler beriledi.

Aıta keteıik, elimizdegi 8 myńǵa jýyq mekteptiń 67% nemese 5247-si – aýyl mektebi. Oqýshylardyń 40% aýyl mektebinde bilim alady.