Úsh jylda 803 jas ǵalym baspanaly boldy
ASTANA. KAZINFORM — Sońǵy 3 jylda elimizde 803 jas ǵalym baspanaǵa ıe boldy. Bul týraly Ǵylym jáne joǵary bilim mınıstrliginen málim etti.
Vedomstvo málimetinshe, jas ǵalymdardy qoldaýǵa baǵyttalǵan «Jas ǵalym» granttyq baǵdarlamasy aıasynda 2022-2025 jyldary jalpy somasy 23,16 mlrd teńge bolatyn 941 joba maquldandy. Baǵdarlama ǵylymdaǵy daryndy jastardy qoldaýǵa, táýelsiz zertteý toptaryn damytýǵa jáne ǵylymı kóshbasshylardyń jańa býynyn qalyptastyrýǵa baǵyttalǵan.
Jobalardy qarjylandyrý kólemi de artqan. Atap aıtqanda, qoldanystaǵy jobalardy qarjylandyrý 2023 jylǵy 2,75 mlrd teńgeden 2025 jyly 7,58 mlrd teńgege deıin ósti.
— Sonymen qatar jas ǵalymdardy turǵyn úımen qamtamasyz etý boıynsha da sharalar qabyldanyp jatyr. Memleket basshysynyń tapsyrmasyna sáıkes, 803 jas ǵalym baspanaly boldy. Onyń ishinde 2023-2026 jyldary «Otbasy bank» AQ arqyly iske asyrylatyn nesıe baǵdarlamasy sheńberinde 660 páter berildi. Al 2024-2026 jyldary Almaty qalasynda 143 jas ǵalymǵa páter tegin tabystaldy, — dep atap ótti mınıstrlikten agenttiktiń resmı saýalyna oraı.
Buǵan deıin jas zertteýshiler elektr jelilerine arnalǵan JI jáne qaterli isikti emdeıtin nanogel ázirlep jatqanyn jazǵan edik.
