Úsh jylda 138 gıdrotehnıkalyq nysanǵa kópfaktorly tekserý júrgizildi
ASTANA. KAZINFORM — Qazaqstan Respýblıkasynyń sý salasyn damytýdyń 2024-2028 jyldarǵa arnalǵan keshendi josparyna sáıkes, respýblıkalyq menshiktegi 168 gıdrotehnıkalyq nysanǵa kópfaktorly tekserý júrgizý kózdelgen. 2024 jyldyń basynan beri búginge deıin Sý resýrstary jáne ırrıgatsııa mınıstrligi 138 gıdrotehnıkalyq nysandy tekserdi.
Bul keshendi josparda qamtylǵan nysandardyń jalpy sanynyń shamamen 82%-yna teń.
Tekserilgen nysandardyń qatarynda Aqtóbe oblysyndaǵy Aqtóbe jáne Qarǵaly sý qoımalary, Almaty oblysyndaǵy Bartoǵaı jáne Kúrti sý qoımalary, Shyǵys Qazaqstan oblysyndaǵy Úıdene sý qoımasy, Jambyl oblysyndaǵy Teris-Aşybulaq sý qoımasy, Batys Qazaqstan oblysyndaǵy Bitik jáne Pıatımar sý qoımalary, Qaraǵandy oblysyndaǵy Yntymaq sý qoımasy jáne Qostanaı oblysyndaǵy Joǵarǵy Tobyl sý qoımasy bar. Jyl sońyna deıin taǵy 10 gıdrotehnıkalyq nysandy tekserý josparlanǵan.
Mınıstrlik málimetinshe, kelesi jyly qalǵan 20 nysan tekserýden ótedi. Kópfaktorly tekserý sý sharýashylyǵy nysandarynyń jaı-kúıin baqylaý jáne olardyń qaýipsizdigin qamtamasyz etý úshin qajet. Mundaı tekserýler jóndeýdi qajet etetin nysandardy der kezinde anyqtaýǵa, sondaı-aq apattar men sý bógetteriniń buzylý qaýpiniń aldyn alýǵa múmkindik beredi.
Tekserý qorytyndysy boıynsha nysannyń qaýipsizdik deklaratsııasy ázirlenip, táýelsiz saraptamaǵa jiberiledi.
- Keshendi josparda kózdelgen is-sharalardy iske asyrý jumystary jalǵasyp jatyr jáne mınıstrliktiń turaqty baqylaýynda. Kópfaktorly tekserýler gıdrotehnıkalyq qurylystardyń tehnıkalyq jaı-kúıi týraly ózekti málimet alýǵa, yqtımal qaýipterdi der kezinde anyqtaýǵa jáne olardyń senimdi jumys isteýin qamtamasyz etý úshin qajetti sharalardy belgileýge múmkindik beredi. Sonymen qatar tekserý nátıjeleri jóndeý jáne qalpyna keltirý jumystaryna qatysty negizdelgen usynystar ázirleýge jol ashady, - dedi Sý resýrstary jáne ırrıgatsııa vıtse-mınıstri Jandos Sálimov.
2030 jylǵa qaraı sý únemdeý tehnologııalary qoldanylatyn alqaptar 1,3 mln gektar bolatynyn jazǵan edik.
