Úsh jylda 12,1 mln gektar jer memleketke qaıtaryldy

ASTANA. KAZINFORM – Igerilmeı jatqan jáne tıimsiz ıgerilip otyrǵan telimderdi memlekettik jer qoryna qaıtarý jumystarynyń aıasynda 12,1 mln gektar alqaptyń ıesi ózgergen.

Jer resýrstaryn basqarý komıtetiniń tóraǵasy – Jerdi paıdalaný men qorǵaý jónindegi bas memlekettik ınspektor Murat Temirjanov ortalyq kommýnıkatsııalar qyzmetinde ótken baspasóz máslıhatynda osyndaı derek keltirdi.

- Barlyq múddeli memlekettik organdardyń úılesimdi jumysynyń arqasynda úsh jylda aýqymdy jumystar atqaryldy. Jalpy kólemi 9,4 mln gektar jerde 4 731 jospardan tys tekserý júrgizilip, memlekettik qorǵa 12,1 mln gektar jer qaıtaryldy. Onyń 5,4 mln gektary 2022 jyly, 4,6 mln gektary 2023 jyly, 2,1 mln gektary 2024 jyly qaıtaryldy, - dedi ol.

Osy jerdiń 4,9 mln gektary jeń jer ıelenýshilerge berilgen.

- 4,9 mln gektar halyqtyń qajettiligi úshin jergilikti organdarǵa berildi. Onyń ishinde 1,9 mln gektar jer jaıylym retinde, 3 mln gektar jer konkýrs negizinde jer paıdalanýshylarǵa úlestirildi. Bul sharalar jaıylym tapshylyǵyn azaıtyp, buryn paıdalanylmaǵan jerlerdi aınalymǵa qosýǵa múmkindik berdi, - dedi komıtet basshysy.

Eske salsaq, bir aı buryn Májilis depýtaty Baqytjan Bazarbek Bas prokýror Berik Asylovtyń atyna saýal joldap, QazUÝ-dyń jeri memleketke qaǵaz júzinde ǵana qaıtarylǵanyn málim etken edi.