Úsh jyl buryn ómir syılaǵan donor men 7 jastaǵy bala alǵash ret kezdesti
ASTANA. KAZINFORM — Daǵystannan kelgen súıek kemiginiń donory úsh jyl buryn ómir súrýge múmkindik syılaǵan 7 jastaǵy balamen alǵash ret Almatyda kezdesti. Bul – súıek kemigi donory men retsıpıenttiń alǵashqy halyqaralyq kezdesýi, dep jazdy Densaýlyq saqtaý mınıstrligi.
Balaǵa nebári 3,5 jasynda «Aplastıkalyq anemııa» dıagnozy qoıylǵan. Bul — súıek kemigi ómir úshin asa mańyzdy qan jasýshalaryn óndirýdi toqtatatyn aýyr qan aýrýy. Balany aman alyp qalýdyń jalǵyz joly súıek kemigin transplantattaý boldy.
2023 jylǵy sáýirde Qazaqstan Respýblıkasy Densaýlyq saqtaý mınıstrliginiń Pedıatrııa jáne balalar hırýrgııasy ǵylymı ortalyǵynda patsıentke gemopoezdik diń jasýshalaryn transplantattaý operatsııasy jasaldy. Úılesimdi donor Reseı Federatsııasynyń tirkeliminen tabylyp, dál osy sheshim balanyń ómirin saqtap qalyp, onyń ósip-jetilýine múmkindik berdi.
— Patsıent ortalyqqa túsken kezde dárigerler oǵan «Júre paıda bolǵan aplastıkalyq anemııa. Óte aýyr túri» degen sońǵy klınıkalyq dıagnoz qoıdy. Retsıpıent pen onyń baýyryna HLA-tıpteý júrgizildi. Ókinishke qaraı, týystarynyń arasynan úılesimdi donor tabylmady. Osyǵan baılanysty týystyq baılanysy joq donordy izdeý protsesi bastalyp, ol Reseıden tabyldy. Keıin gemopoezdik diń jasýshalaryn allogendik transplantattaý jasaldy. Búginde arada úsh jyl ótti, balanyń jaǵdaıy qanaǵattanarlyq, — dedi gemopoezdik diń jasýshalaryn transplantattaý bólimshesiniń meńgerýshisi Erǵalı Sársekbaev.
Bul oqıǵanyń erekshe mańyzdylyǵy — donor da, retsıpıent te Daǵystannan shyqqanymen, ártúrli elderde turady. Búginde bala 7 jasta. Ol mektepke baryp, birinshi synypty aıaqtady, oınaıdy, armandaıdy jáne tolyqqandy ómir súrip jatyr.
Kezdesý barysynda Ahmet pen Abdýlla er azamattarǵa tán sabyrlylyqpen qol alysyp, keıin bir-birin qushaqtady. Al Abdýllanyń anasy tolqýyn jasyra almaı, kóz jasyna erik berdi.
— Raqmet saǵan, Ahmet! Úlken raqmet! — dedi 7 jasar Abdýlla ıAhııarov ózin qutqarǵan, genetıkalyq turǵydan eń jaqyn adamyn qushaqtap.
— Naǵyz batyrlar — osy kezdesýdiń ótýine sebep bolǵan barlyq dárigerler. Daǵystanda da, Qazaqstanda da eńbek etken mamandarǵa alǵysym sheksiz. Men tek sebepker boldym. Qudireti kúshti Alla meni osy balaǵa kómektesý úshin tańdady, — dedi Daǵystannan kelgen 30 jastaǵy Ahmet Abdýllaev qarapaıymdylyqpen.
— Transplantatsııa jasaý qarqyny jyldan-jylǵa artyp keledi. 2025 jyly Balalar onkologııasy jáne gematologııasy ortalyǵynda 2500-den astam bala em qabyldady. Barlyǵy 58 transplantatsııa jasaldy, onyń ishinde 18 aýtologııalyq, 8 gaploıdentti jáne 31 gemopoezdik diń jasýshalaryn allogendik transplantattaý, sondaı-aq týystyq baılanysy joq donorlardan 12 transplantattaý oryndaldy, — dep atap ótti kezdesýde Pedıatrııa jáne balalar hırýrgııasy ǵylymı ortalyǵynyń Balalar onkologııasy men gematologııasy respýblıkalyq ortalyǵynyń basshysy Gúlnara Ábdilova.
Kezdesýdiń maqsaty — súıek kemigi donorlyǵynyń mańyzdylyǵyna qoǵam nazaryn aýdarý jáne eń kúrdeli jaǵdaılarda da patsıentterge ómir súrýge múmkindik beretin Ulttyq donorlar tirkelimin damytýǵa qoldaý kórsetý.
Aıta keteıik, elimizde 2026 jyldyń І toqsanynda 77 aǵza transplantattaldy.
