Úsh jyl buryn bastalǵan Aqtóbe-Atyraý jolynyń qurylysy bıyl aıaqtalýy tıis
AQTÓBE. KAZINFORM — 2021 jyly qurylysy bastalǵan «Aqtóbe-Atyraý» baǵytyndaǵy tasjol qurylysy bıyl aıaqtalýy tıis. Búgin Qandyaǵash qalasynda 16 shaqyrymdyq aınalma jol qoldanysqa berildi.
Aqtóbe-Atyraý baǵytyndaǵy jolda 16 shaqyrymdyq aınalma jol qurylysy aıaqtaldy. Munda bir kólik jol toraby, 7 jasandy qurylys, eki mal ótkeli jáne 5 sý ótkizgish qubyry salyndy.
Aınalma jol Atyraý, Mańǵystaý oblystaryna qatynaıtyn kólikterdiń qalaǵa kirmeı, aınalyp ótýine múmkindik beredi.
— Aqtóbe-Qandyaǵash jolyn salý jobasy eki lotqa bólindi. Aqtóbe qalasynan Tamdy aýylyna deıin jáne Tamdy aýylynan Qandyaǵash qalasyna deıingi aralyq qurylysy 2021 jyly bastaldy. Bıyl joldy qoldanysqa berýdi josparlap otyrmyz. Qazir joldyń tómengi qabatyn tóseý jumysy aıaqtaldy. Tek joǵary qabaty qalyp tur. Onyń da 90% daıyn. Birinshi ýchaskede 12, ekinshi ýchaskede 10 shaqyrym qaldy. Jolǵa asfalt tóseý aıaqtalǵan soń joldy tańbalaý, jol belgilerin, qorshaý ornatý jyl sońyna deıin jalǵasady. Investıtsııalyq joba bolǵan soń Azııa damý bankiniń talabyna sáıkes 2 jyl kepildik beriledi. Biraq bul jol 10-15 jyl úzdiksiz qyzmet kórsetetinine senimdimiz, — dedi «QazAvtoJol» AQ AOF dırektory Aıbol Danaǵul.
Aıta keteıik, qaıta jańartý jumystary barysynda joldyń tehnıkalyq parametrleri ózgerdi. Joldyń 77,8 shaqyrymy ІІ sanattan І sanatqa, al 18,2 shaqyrymy ІІ sanatqa aýystyryldy.
Al «Aqtóbe-Qandyaǵash» ýchaskesiniń jalpy uzyndyǵy — 96 shaqyrym. Qurylysqa shamamen 64 mlrd teńge jumsaldy.
Jobany júzege asyrýǵa úsh asfaltbeton zaýyty, 254 jol-qurylys tehnıkasy men 574 jumysshy jumyldyrylǵan.
Joba aıasynda 94 jasandy qurylys nysanyn soǵý josparlanǵan, onyń ishinde 15 kópir, 16 mal aıdaý, 3 kólik jol aıryǵy men 60 sý ótkizgish qubyr bar.
Eske salsaq, Aqtóbe-Atyraý baǵytyndaǵy tasjoldy jóndeý jumysy 2018-2020 jyldary júrgiziledi dep josparlanǵan.
