Úsh jasópirimnen telefondaryn tartyp alǵan: Astana polıtsııasy kúdiktini ustady
Nur-Sultan qalalyq Polıtsııa departamentiniń málimetinshe, «102» arnasyna Syǵanaq kóshesindegi úıdiń kireberisinde belgisiz bireýdiń kámelettik jasqa tolmaǵan balanyń uıaly telefonyn tartyp alǵany týraly habarlama túsken. Jedel-izdestirý is-sharalarynyń nátıjesinde Saýran kóshesindegi úıdiń aýlasynda kúdikti ustalyp, tergeý úshin «Esil» aýdanynyń polıtsııa bólimine jetkizilgen.
«Tekserý barysynda ustalǵan 27 jastaǵy azamattyń elorda aýmaǵynda bir táýlik buryn jasalǵan eki tonaý faktisine qatysy bar ekeni anyqtaldy. Buzaqy Saýran kóshesindegi úıdiń boıynda kámeletke tolmaǵan jasóspirimnen «Samsýng» markaly uıaly telefonyn ashyq túrde tartyp alǵan. Sodan keıin ol dál sol úıdiń aýlasynda 11 jasar balanyń da «Samsýng» markaly uıaly telefonyn alyp ketken», - dep atap ótedi departamentten.
Taratylǵan málimetke qaraǵanda, kúdikti uıaly telefondardy satyp úlgergen. Atalǵan fakti boıynsha QR QK-niń 191-babyna sáıkes sotqa deıingi tergeý júrgizilýde. Ustalǵan adam ýaqytsha oqshaýlaǵyshqa qamaldy.
«Osy jyldyń 10 aıynda elorda aýmaǵynda 185 tonaý oqıǵasy oryn alsa, onyń ishinde altaýy kámelettik jasqa tolmaǵandarǵa qatysty. Barlyq qylmys izi sýymaı ashyldy», - dedi Nur-Sultan qalasy PD Krımınaldyq polıtsııa basqarmasynyń bastyǵy Dmıtrıı Demıdov.