Úsh jasar balany ajaldan qutqarǵan maqtaraldyq muǵalim marapattaldy
ShYMKENT. QazAqparat - Ońtústik Qazaqstan oblysynda 3 jasar balany ajaldan qutqarǵan muǵalimge qurmet kórsetildi.
Maqtaral aýdandyq Tótenshe jaǵdaılar bóliminiń basshylyǵy Aıgúl Tursynqulovany alǵys hatpen marapattap, syı-sııapattar tabys etti, dep habarlaıdy QazAqparat HAA tilshisi.
Muǵalimniń ózi de úsh balanyń anasy, sondyqtan sýǵa oılanbastan sekirgen. «Meniń ornymda kez kelgen adam solaı jasar edi»,- deıdi Aıgúl Tursynqulova.
Esterińizge salsaq, Maqtaral aýdanyndaǵy Keńesshil eldi mekeninde aýyl shetindegi kanalǵa úsh jasar búldirshinniń batyp bara jatqanyn kórgen Aıgúl Tursynqulova oılanbastan, ústindegi kıimimen sýǵa sekirgen. Sóıtip, sýǵa tunshyqqan úsh jasar Ábdisálipti syrtqa alyp shyǵady. Qazir búldirshinniń jaǵdaıy qalypty. Onyń ata-anasy men aýyl turǵyndary baldyrǵandy ajaldan aman alyp qalǵan ustazǵa rızashylyqtaryn bildirdi.
