Úsh jasar bala aıaz býǵan taıgadan jalǵyz ózi shyqqan
HABAROVSK. QazAqparat - RF Habarovsk ólkesine jaqyn mańdaǵy ormanda qalyp qoıǵan úsh jasar bala aman qaldy. Ol shaǵyn eldi mekennen birneshe shaqyrymdaǵy ózenge batyp ketken ákesiniń óliminen keıin jalǵyz qalǵan, dep habarlaıdy QazAqparat TASS-qa silteme jasap.
Bul týraly búgin RF Komsomolsk aýdany Kenaı aýylynyń ákimshiligi habarlady.
Jergilikti turǵyn keshkisin ulyn balabaqshadan alyp, birge ózenge barǵan. Ol aldaǵy kúnderi balyq aýlaýǵa barý úshin joldy bilip qaıtpaqshy bolǵan. Er adam eldi mekennen 3 shaqyrym qashyqtyqtaǵy ormanda balasyn jaǵalaýǵa túsirip ketken. Ózi qar keshkishpen ózenniń ústimen júrip kele jatqanda, muz jarylyp, sýǵa batyp ketken.
Balanyń túsindirýinshe, ákesi ulyna aýylǵa qaıtýyn aıtyp qana úlgergen.
Búldirshin qar keshkishtiń izimen úıine qaıtpaqshy bolady. Ol jolǵa shyqqannan keıin, aýylǵa qarama-qarsy baǵytpen ketip qalady. Aýa temperatýrasy túnde 30-35 gradýs aıaz bolǵan.
«Abyroı bolǵanda, kólik múldem júrmeıtin jolmen aǵash daıyndaıtyn kásiporynnan jergilikti turǵyndardyń biri úıine qaıtyp kele jatqan. Ol balany kórip qalyp, úıine jetkizgen», - dedi aýyl ákimshiliginiń qyzmetkeri Gúlnara Kanavtseva.
Qazirgi tańda muzdyń astyna batyp ketken er adamnyń denesi izdestirilip jatyr.
