Úsh ýnıversıtettiń stýdentteri turady: Almatyda jańa jataqhana ashyldy
ALMATY. KAZINFORM – Almatyda 250 oryndyq jańa zamanaýı stýdenttik jataqhana paıdalanýǵa berildi.
Almaty ákimdiginiń habarlaýynsha, jataqhana jańa standarttarǵa saı etip salynǵan. Ǵımaratta stýdentterdiń qaýipsizdigin qamtamasyz etetin beınabaqylaý júıesi bar. Ár bólmede jeke sanıtarlyq torap, turmystyq tehnıka jáne ózdiginen as ázirleýge arnalǵan jabdyqtar qarastyrylǵan. Sonymen qatar stýdentterdiń oqýy men alańsyz demalýyna da barlyq jaǵdaı jasalǵan.
Atap óterligi, bul jataqhanada úsh joǵary oqý ornynyń jastary turady. Munda qazirgi ýaqytta stýdentterdiń alǵashqy legi qonystana bastaǵan.
– Almatyda jańa stýdenttik jataqhananyń ashylýy – stýdentterge qolaıly oqý men turmys jaǵdaıyn qamtamasyz etý jónindegi Prezıdent tapsyrmasyn oryndaýdaǵy mańyzdy qadam. Biz búgin oryn tapshylyǵy máselesin sheship qana qoımaı, jastarymyzdyń bolashaǵyna ári qalanyń damýyna qyzmet etetin zamanaýı ınfraqurylym qalyptastyryp jatyrmyz, - dedi Almaty qalasy Jastar saıasaty basqarmasynyń basshysy Ázız Qajdenbek.
Nysan jeke ınvestıtsııalar esebinen salynǵan. Ákimdiktiń málimetinshe, búginde eki tetik jumys isteıdi: jańa jataqhana salǵan jaǵdaıda alty jyl boıy ár stýdentke 230 AEK kóleminde shyǵyn óteledi, al ǵımaratty qaıta jańǵyrtqan jaǵdaıda segiz jyl boıy 92 AEK kóleminde tólem qarastyrylǵan.
Jańa oqý jyly bastalǵanǵa deıin Almatyda taǵy úsh zamanaýı jataqhana ashylady. Olardyń jalpy syıymdylyǵy 1 100-den astam orynǵa eseptelgen. Jyl sońyna deıin 15 jańa nysan paıdalanýǵa berilip, 6 myńnan astam stýdent qosymsha orynmen qamtylady.
Qazirgi tańda qalada 120-dan astam jataqhana jáne shamamen 60 hostel jumys isteıdi. Olardyń bir bóligi stýdentterdi ýaqytsha ornalastyrý baǵdarlamasyna tartylǵan. Ár joǵary oqý ornynda stýdentterdiń turmystyq máseleleri men shaǵymdaryn qabyldaıtyn jedel ortalyqtar bar.
Eske salaıyq, buǵan deıin Ǵylym jáne joǵary bilim mınıstri Saıasat Nurbek Úkimet otyrysynda Almatydan basqa óńirde jataqhana tapshylyǵy joq ekenin aıtqan edi.