Úsh ýnıversıtette tekstologtar men kodıkologtardy daıarlaıtyn magıstratýra ashylady

ASTANA. QazAqparat – Ál-Farabı atyndaǵy Qazaq ulttyq ýnıversıteti, Abaı atyndaǵy Qazaq ulttyq pedagogıkalyq ýnıversıteti jáne L. Gýmılev atyndaǵy Eýrazııa ulttyq ýnıversıteti bazasynda magıstratýra baǵdarlamasy boıynsha tekstologtardy, kodıkologtardy daıarlaýdyń jańa baǵyttaryn ashý josparlanyp otyr. Premer-Mınıstrdiń orynbasary – Eńbek jáne halyqty áleýmettik qorǵaý mınıstri Tamara Dúısenova Senat depýtattarynyń saýalyna joldaǵan jaýabynda osyndaı málimet aıtty, dep habarlaıdy QazAqparat tilshisi.

«Ejelgi túrki, shaǵataı, arab jazýlarynyń eskertkishterinde sımvoldardy erkin oqıtyn, olardy zerdeleýdiń kodıkologııalyq ádisterin qoldanýǵa qabiletti ǵalym-mamandardy daıarlaý maqsatynda ál-Farabı atyndaǵy Qazaq ulttyq ýnıversıteti, Abaı atyndaǵy Qazaq ulttyq pedagogıkalyq ýnıversıteti, L. Gýmılev atyndaǵy Eýrazııa ulttyq ýnıversıteti bazasynda magıstratýra baǵdarlamasy boıynsha tekstologtardy, kodıkologtardy daıarlaýdyń jańa baǵyttaryn ashý josparlanýda. Jyl saıynǵy ǵylymı taǵylymdama sheńberinde ǵalymdardy 27 eldiń 138 sheteldik ǵylymı ortalyǵyna, onyń ishinde Túrkııa, Qytaıǵa jiberý josparlanyp otyr. Sondaı-aq, Irannyń ǵylymı ortalyqtaryn qosý boıynsha jumystar júrgizilýde» delingen jaýapta.

Onyń aıtýynsha, Mádenıet jáne sport mınıstrligi qyrkúıek-qazan aılarynda shyǵys (arab, parsy, shaǵataı, tóbe) jáne eski slavıan tilderin meńgergen tarıhshylardyń, shyǵystanýshylardyń, dintanýshylardyń, qandas ǵalymdardyń qatysýymen «Qazaqstandaǵy sırek kezdesetin qorlar: saqtaý jáne bir ortalyqtandyrý» respýblıkalyq ǵylymı-praktıkalyq konferentsııasyn ótkizýdi josparlap otyr.

«Konferentsııada ortalyqtandyrýdyń, katalogtaýdyń ózekti máselelerin jáne Saraptamalyq keńestiń negizgi fýnktsııalaryn talqylaý kózdelgen», - dep jazady vıtse-premer.