Úsh tildi bilim berýdi engizýde kóptegen túsiniksiz nárselerdiń bolýyna bizden de kiná bar - D.Nazarbaeva
ASTANA. QazAqparat - Úsh tildi bilim berýdi engizýde kóptegen túsiniksiz nárselerdiń bolýyna bizden de kiná bar. Qazaqstan bilim salasy qyzmetkerleriniń respýblıkalyq tamyz keńesinde sóz sóılegen QR Premer-Mınıstriniń orynbasary Darıǵa Nazarbaeva osylaı dedi.
«Kelesi ózekti qoǵamdyq rezonans týdyrǵan taqyryp, ıaǵnı úsh tildi bilim berýdi engizý. Bul saıasatta kóptegen túsiniksiz nárselerdiń bolýyna bizde de kiná bar. Muny moıyndaımyz», - dedi Darıǵa Nazarbaeva.
Onyń atap ótýinshe, úsh tildi bilim berý kezeń-kezeńmen júzege asyrylady jáne eń aldymen 10-11 synyptarda ǵana tek 2019 jyldan bastalady.
«Osy másele boıynsha áli de túsindirý jumystaryn jastar men oqýshylar, olardyń ata-analary arasynda da júrgizý qajet. Jumysty jandandyrý úshin bizdiń áli de 2 jyldan astam ýaqytymyz bar»,- dedi vıtse-premer.
